DILI, STLTIMORLESTE.com – Timor Gap E .P. no Empreza Petrotim Resources S.A. asina Joint Operating Agreement (JOA) ba Production Sharing Contract (PSC) TL-OT-25-24, hodi estabelese enkuadramentu kontratual ba jestaun no implementasaun atividade sira iha Bloku B.
Tuir akordu PSC ne’e, Petrotim Resources S.A. iha interese partisipasaun 70% no sai hanesan operador, enkuantu TIMOR GAP iha interese partisipasaun 30%.
PSC TL-OT-25-24 kobre área sira ne’ebé lokaliza prinsipalmente iha Munisípiu Bobonaro no Ainaro, ho área adisionál sira ne’ebé estende ba Ermera, liuliu iha Atsabe, no parte balun husi Covalima.
Prezidente no CEO TIMOR GAP, Rui Maria Alves Soares hatete katak, asinatura JOA ne’e sai hanesan enkuadramentu importante atu jere relasaun entre parseiru rua iha Bloku B.
“Ohin ita selebra asinatura JOA ne’ebé sai hanesan enkuadramentu ida atu jere relasaun entre parseiru TIMOR GAP ho Petrotim iha Bloku B,” dehan Rui Maria Alves Soares iha Timor Plaza, Sesta (25/09/2026).
Nia hatete, servisu no estudu ne’ebé TIMOR GAP no Governu halo ona iha bloku ne’e iha pasadu bele sai hanesan baze ba atividade sira iha futuru.
Nia esplika katak, ho partisipasaun 30% TIMOR GAP hamutuk ho Petrotim nu’udar operador, parte rua bele kontinua hadi’a estudu sira no kumpre kompromisu no obrigasaun sira tuir PSC, ho objetivu atu dezenvolve Bloku B no kontribui ba dezenvolvimentu indústria petróleu iha Timor-Leste.
Iha parte seluk, reprezentante Petrotim Resources S.A., Tim Lay hatete katak, empreza ne’e reforsa kompromisu atu kumpre obrigasaun no despeza sira ne’ebé define iha akordu.
Nia hatete, JOA sei define relasaun entre parte rua, programa atividade sira, prosesu ezekusaun, no mekanizmu atu rezolve problema sira, inklui asuntu ambiente.
Tim Lay mós hatete, katak sei hala’o estudu durante tinan ida ka liután, molok halo análize no prepara ba fase atividade tuir mai.
Asinatura JOA ne’e marka pasu importante iha parseria entre TIMOR GAP Onshore Block B no Petrotim Resources S.A., no estabelese baze ba koordenasaun atividade eksplorasaun no dezenvolvimentu tuir PSC TL-OT-25-24.
(joa)
