DILI, STLTIMORLESTE.com – Primeiru-Ministru (PM), Kay Rala Xanana Gusmão hala’o enkontru ho Embaixadór Britániku Naun Rezidénsia, Dominic Jeremy, ko’alia kona-bá hametin kooperasaun bilaterál ba dezenvolvimentu entre Timor-Leste (TL) ho Reinu Unidu.
Enkontru Xefe Governu Xanana ho Embaixador Britaniku Naun Rezidensia, Doinic ne’e hala’o iha Palásiu Governu, Dili, Segunda (28/09/2026), nu’udár oportunidade atu reafirma amizade no hametin relasaun kooperasaun entre nasaun rua.
“Ohin ami hasoru malu nee, atu reafirma kooperasaun bilateral entre Timor Leste ho Reinu Unidu,” Embaixadór Dominic Jeremy bá jornalista sira hafoin enkontru ho Xefe Governu Timor Leste.
Diplomata Britániku ne’e hateten katak, nu’udár parseiru diálogu Association Of Southeast Asian Nation (ASEAN) nian, Reinu Unidu selebra ona tinan 5 nu’udár parseiru diálogu ASEAN iha tinan 2026.
Dominic hato’o nia sentimentu kontente kona-bá adezaun Timor-Leste nu’udár membru plenu ASEAN, ne’ebé besik kompleta ona tinan ida.
“Ida nee oportunidade diak ida ba hau ho Primeiru Ministru, Kay Rala Xanana Gusmao, atu haree fila fali ami nia amizade hamutuk no atu define objetivu sira, kona ba oinsa ami hakarak dezenvolve amizade nee iha futuru. Liu husi enkontru nee, ami haree katak, amizade entre Timor Leste ho Reinu Unidu, kontinua buras ba bebei,” dehan Dominic.
Dominic Jeremy mós haktuir katak, iha tinan 2000, nia reprezenta Reinu Unidu durante períodu Administrasaun Tranzitória Nasoins Unidas iha Timor-Leste (UNTAET) no hola parte iha prosesu harii nasaun foun Timor-Leste.
“Hau kontente tebes katak, relasaun entre Timor Leste ho Reinu Unidu sai metin liu tan, ida nee importante tebes ba hau, tanba hau serbisu ona iha Timor Leste desde tinan 26 liu ba no haree relasaun nee buras durante periodu neeba. Neebe liu husi enkontru nee, ami hanoin hamutuk kona ba oinsa atu avansa liutan kooperasaun bilateral entre nasaun rua iha futuru,” afirma Dominic.
Iha biban nee, Embaixadór Britániku mós informa katak, Timoroan liu-30.000 hela iha Reinu Unidu no kontribui bá dezenvolvimentu ekonomia nasaun ne’e. Sira mós kontribui bá família iha Timor-Leste liuhosi osan ne’ebé haruka mai rai-laran.
Durante enkontru ne’e, PM Xanana Gusmão ho Embaixadór Dominic Jeremy ko’alia mós kona-bá programa bolsa estudu bá sidadaun Timoroan sira atu kontinua sira-nia estudu iha Reinu Unidu, nu’udár parte hosi esforsu atu hametin kooperasaun iha área edukasaun no dezenvolvimentu rekursu umanu.
(jos)
