DILI, STLTIMORLESTE.com – Tribunál Judisiál Primeira Instánsia Dili (TJPD) liuhusi Juiza Turnu Julmiaty Freitas aplika medida koasaun rua ba arguidu nain neen (6) neebe suspeitu ba krime Scamming Call Centre iha area Kolmera.
Despaixu nee fo sai iha interogatóriu dahuluk Sábadu nee hafoin arguidu sira detein iha loron 03 Setembru hosi ekipa konjunta Diresaun Servisu Investigasaun Kriminál no Servisu Informasaun Polísia iha flagrante delitu.
Ministeriu Públiku neebe reprezenta hosi Prokuradór Rafael Gusmão akuza arguidu sira ho krime burla informátika, esplorasaun jogu ilísitu, asosiasaun kriminozu no brankamentu kapitál. MP husu Tribunal atu aplika proibisaun ausénsia ba pasaporte arguidu sira no kausaun ho valór US$ 5000.
Maibe Tribunál deside aplika deit kausaun US$ 4000 ba kada arguidu, ho prazu pagamentu loron 10. Arguidu sira mós la bele sai hosi territóriu nasionál no tenke informa ba MP bainhira muda hela fatin.
Advogadu privadu Euzebio Xavier husu atu menus valor kausaun tanba arguidu sira presiza osan ba sustenta moris. Juiza konsidera valor US$ 4000 natoon.
Tuir despaisu, se arguidu sira la selu iha prazu neebe determina, sira sei hasoru konsekuénsia krime seluk.
(jen)
