DÍLI, STLTIMORLESTE.com – Universidade Nasional Timor Lorosae (UNTL) husu finalista sira husi área ekonómia jestaun no kontabilidade atu uza koñesimentu profisionál hodi kontribui ba dezenvolvimentu nasionál.
Lia hirak ne’e hato’o husi Pró-Reitór ba Asuntu Kooperasaun Universidade Nasionál Timor Lorosa’e (UNTL), Cristóvão dos Reis liu husi nia diskursu iha serimónia Yudisium Fakuldade Ekonómia no Jestaun (FEG), iha Salaun Delta Nova, Kuarta-feira (18/11/2026).
Iha diskursu ne’e, Cristóvão dos Reis ne’ebé reprezenta Magnífiku Reitór UNTL, hato’o parabéns ba estudante finalista sira husi Departamentu Siénsia Ekonómika, Jestaun no Kontabilidade, tanba konsege remata etapa importante ida iha sira-nia formasaun akadémika.
Nia hatete katak, Judisium la’ós de’it serimónia atu marka remata prosesu estudu, maibé mós sai rekonesimentu ba dedikasaun, dixiplina, perseveransa no kompromisu estudante sira-nian durante prosesu aprendizajen.
Nia esplika katak, área siénsia tolu ne’e iha importánsia estratéjika ba dezenvolvimentu ekonómiku, sosiál no institusionál Timor-Leste nian.
Ba área Siénsia Ekonómika, nia konsidera katak Timor-Leste presiza ekonomista sira ne’ebé iha kapasidade analítika, hanoin krítiku no kompeténsia investigasaun atu avalia polítika públika no formula estratéjia bazeia ba evidénsia sientífika.
Nia mós temi katak, ekonomista sira iha papél importante atu responde ba dezafiu diversifikasaun ekonómika, hamenus dependénsia ba reseita mina-rai, dezenvolve agrikultura, promove investimentu no kria oportunidade servisu.
Enkuantu área Jestaun, nia hateten katak Timor-Leste presiza jestór sira ho kualifikasaun no kompeténsia lideransa, planeamentu estratéjiku, inovasaun no kapasidade foti desizaun, atu moderniza instituisaun, hametin setór privadu no promove empreendedorizmu.
“Jestaun la’ós de’it katak iha autoridade, maibé liu liu asume responsabilidade, lidera ema no uza rekursu ne’ebé iha ho efisiente, transparente no étika,” nia afirma.
Iha área Kontabilidade, nia subliña katak profisionál sira tenke iha kompeténsia téknika, rigor no responsabilidade étika atu hametin transparénsia finanseira, responsabilidade institusionál no prinsípiu governasaun di’ak iha setór públiku no privadu.
Nia hatutan katak, área siénsia tolu ne’e kompleta malu, tanba Ekonómia ajuda komprende fenómenu ekonómiku no formula estratéjia dezenvolvimentu, Jestaun transforma estratéjia sira-ne’e sai asaun, no Kontabilidade asegura informasaun finanseira, kontrolu no transparénsia iha utilizasaun rekursu.
Iha parte seluk, Cristóvão dos Reis hato’o agradesimentu ba inan-aman no família estudante finalista sira, tanba sira-nia apoiu, sakrifísiu, domin no fiar sai baze importante ba susesu estudante sira-nian durante prosesu estudu.
Nia mós agradese ba diretór departamentu, dosente no funsionáriu administrativu sira, ne’ebé liuhusi dedikasaun, profisionalizmu no responsabilidade kontribui ba formasaun akadémika no profisionál estudante sira-nian.
Iha rohan diskursu, nia enkoraja graduadu sira atu uza koñesimentu no kompeténsia ne’ebé hetan iha universidade hodi servisu ba dezenvolvimentu nasionál, ho étika, inovasaun no responsabilidade.
Nia afirma katak, futuru Timor-Leste depende ba kualidade rekursu umanu, kapasidade inovasaun no kompromisu jerasaun foun sira-nian.
Iha naran Magnífiku Reitór no ekipa Reitoria UNTL, nia hato’o parabéns ba graduadu hotu no hein katak koñesimentu, talentu no kompeténsia ne’ebé sira dezenvolve durante prosesu estudu bele sai instrumentu ba transformasaun, inovasaun no progresu Pátria doben Timor-Leste.
(joa)






