UNTL Husu Graduadu Kontribui Dezenvolvimentu

Foto: STL/Joaninha Belo

DÍLI, STLTIMORLESTE.com – Universidade Nasionál Timor Lorosa’e (UNTL) realiza serimónia yudisium ba estudante finalista na’in 189, husi Departamentu Siénsia Ekonómika, Jestaun no Kontabilidade, iha Dili, Kuarta-feira (18/11/2026).

Iha Fatin hanesan, Dekanu Fakuldade Ekonómia no Jestaun (FEG) Universidade Nasionál Timor Lorosa’e (UNTL), Filipe Mendes Pereira hatete, graduasaun la’ós signifika prosesu aprendizajen remata ona, maibé sai hahú husi responsabilidade foun ida ba sosiedade no nasaun.

Nia husu graduadu sira atu uza koñesimentu ne’ebé sira hetan iha área ekonómia, jestaun finanseira no kontabilidade hodi kontribui ba dezenvolvimentu nasionál, liuliu Timor-Leste.

Nia esplika katak, iha tempu ohin, Timor-Leste hasoru dezafiu boot iha área ekonómika no sosiál, hanesan diversifikasaun ekonómika, kriasaun oportunidade empregu, hametin setór privadu, dezenvolve espíritu empreendedorizmu no hadi’a sistema jestaun rekursu públiku.

Tanba ne’e, nia hein katak graduadu foun sira sei sai profisionál ne’ebé iha kompeténsia, responsabilidade, inovasaun no kompromisu atu kontribui ba dezenvolvimentu sustentável Timor-Leste.

Nia mós hato’o apresiasaun ba dosente, funsionáriu, dirijente, akademiku no ema hotu ne’ebé kontribui ba formasaun akadémika graduadu sira-nian.

Dekanu FEG ne’e la haluha hato’o agradesimentu espesiál ba inan-aman no família sira, tanba sira-nia apoiu, konfiansa no sakrifísiu durante prosesu estudu to’o estudante sira konsege atinji momentu importante ida-ne’e.

Iha parte ikus, nia enkoraja graduadu sira atu hametin valor fundamentál tolu, hanesan koñesimentu, integridade no responsabilidade, no la buka de’it oportunidade ba sira-nia an rasik, maibé mós kria oportunidade ba ema seluk.

Nia mós hato’o parabéns ba graduadu hotu no dezeja atu sira hetan susesu iha moris profisionál no pesoál, no formasaun ne’ebé sira hetan sai instrumentu importante atu harii futuru di’ak liu ba Timor-Leste.

(joa)

Share it :

Leave a Reply

Your email address will not be published. Required fields are marked *