AMBENO, STLTIMORLESTE.com – Veteranus Oecusse triste ba dezenvolvimentu Rejiaun Administrativa Espesial Oecusse-Ambeno (RAEOA) marka pasu, tanba la iha seriedade husi estrutura defenitivu Autoridade RAEOA ho Estrutura.
Informasaun nee hatoo husi Prezidente Munisipal Konselhu Nasional Libertasaun RAEOA, Antonio da Conceicao “Mau Kiak Lifau” ba STL iha ninia knaar fatin Santa Rosa, Suku Costa, Postu Administrativu Pantemakassar Oecusse, Kinta (06/08/2026).
“Ita haree Autoridade RAEOA ho ninia estrutura definitivu halao ona servisu kuaze fulan tolu ona, maibe ita haree sira nia seriedade hodi halao dezenvolvimentu iha Oecusse, la lao, dezenvolvimentu marka pasu deit, tanba nee mak ita triste haree situasaun atual neebe lao daudaun iha Oecusse,” dehan nia.
Antonio afirma, haree dezenvolvimentu iha RAEOA lao lentu, tanba sira la iha planu no la iha programa. Estrutura iha Oecusse loos ona, mesak ema Oecusse oan, maibe Atoni oan nee tenke onestidade, muda karakter onestidade haree povu nia moris no tenke badinas, labele koalia barak maibe maibe realidade serbisu la lao.
“Hau haoin, estrutura Autoridade atual nee, mesak ema atoni Oecusse oan deit maibe tenke badinas serbisu no Onestu, ida nee imporante tanba uluk, ita nia avo sira serbisu makaas, depois sira serbisu ho Onestu, atu haree Oecusse ninia dezenvolvimentu nee bele lao, tanba ita hotu-hotu merasa memiliki Oecusse. Ita sente triste tanba ita haree ita nia rai nee lao hanesan nee, dezenvolvimentu la lao, ita nia povu presiza dezenvolvimentu iha area infraestrutura tenke lao too baze para ita nia povu lori sira nia produtu sira nee ba merkadu atu buka osan, sustenta nesesidade moris loron-loron nian.
Nia dehan, dezenvolvimentu lao lentu tanba lentu iha parte aprivizionamentu no finansa RAEOA, tanba saida maka lao lentu, keta halo ba PA-RAEOA mak la fahe serbisu ba Diretor Rejional sira ga oinsa.
“Ita hakarak nee dezenvolvimentu Oecusse tenke lao lalais, agora orsamentu nee iha ona, hein fali saida, orsamentu tenke uza hodi halao dezenvolvimentu, sei dezenvolvimentu la lao, orsamentu paradu, ita la hatene prosentu hira mak uza ona no hira mak sedauk utiliza,” dehan nia.
Iha fatin seluk, Jestor Postu Administrativu Pasabe, Paulino Marques, husu ba kompanhia neebe ateru estrada husi Oesilo ba too fronteira Haumeni ana Pasabe, atu kontinua tau matan ba obra nee hodi halo barazen no bee dalan.
“Hau husu ba kompanhia neebe kaer obra ateru Estrada husi Oesilo ba Pasabe, atu halo barajen no bee dalan lalais iha tempu bailoron, atu nunee iha tempu udan labele estraga fali Estrada nee, sei kompanhia la iha seriedade atu servisu ho lalais maka tempu udan bee sei implika Estrada aat fila fali,” dehan nia.
Iha fatin seluk, Daniel Suni nuudar Povu Nitibe, husu ba governu Autoridade RAEOA, atu tau matan ba dezenvolvimentu infraestrutura Oecusse, liu-liu Estrada atu nunee kompanhia serbisu ho seriu iha tempu bailoron, tanba tempu udan ona prezudika serbisu.
“Ami povu area remotas husu ba IX Governu Konstitusional atu seriu halo serbisu hadia Estrada iha area remotas tanba dadaun tempu bailoron ona, rai rahun sae makaas governu sedauk fui sumentu ba Estrada ou nahe alkatraun, nunee fatin balun kompanhia sedauk halo barajen nomos bee dalan. Ita haree iha tinan kotuk, governu loke dalan ba fatin-fatin maibe kontinuasaun husi obra hirak nee maka lao lentu loos,” afirma Daniel.
Antes nee, Prezidente Autoridade RAEOA, Regio da Cruz Salu iha ninia deskursu bain hira prezide serimonia isar Bandeira Nasional iha primeira semana fulan Agostu nian, kestiona serbisu Aprovizionamentu no finansas RAEOA, lao tarde.
“Hau husu ba administrasaun finansas no aprovizionamentu, favor ida, prosesu lalais pagamentuba setor privadu sira, tanba hau asina ona projetu lubuk ida maibe ate agora husi parte aprovizionamentu no finansas sedauk halo pagamentu,” dehan PA-RAEOA.
Nia dehan, Diretor Finansa ho nia funsionariu sira durante nee la serbisu, tanba projetu barak maka seidauk halo pagamentu, ida nee fo impaktu ba ezekusaun Orsamentu Jeral Estadu (OJE) iha RAEOA lao lentu tebes.
(jos)
