DILI, STLTIMORLESTE.com – Organizasaun Mundial Saúde (WHO) entrega Abate 6.000 kilograma no Malathion 3.100 litru ba Ministériu Saúde (MS) atu hametin prevensaun dengue antes tempu udan.
WHO ho apoiu KOICA entrega ekipamentu kontrolu vetor ba Ministériu Saúde (MS), liu husi Diresaun-Jeral Kuidadu Saúde Primária, atu hametin prevensaun no kontrolu dengue iha Timor-Leste.
Diretora-Jeral Kuidadu Saúde Primária, Elizabeth Leto Mau, hatete Abate no Malathion sei uza ba kontrolu susuk ne’ebé transmite dengue, liuliu iha tempu udan.
“Malathion ita uza ba susuk, no Abate ita tau ba tanke atu hamate susuk ne’ebé iha tanki laran. Bainhira udan monu, ita halo ona prevensaun,” dehan Elizabeth ba jornalista sira iha MoH Lahane, Kuarta-feira (30/09/2026).
Nia hatete, atividade prevensaun dengue liu husi uza Abate no Malathion komesa ona semana rua liu, no apoiu foun ne’e sei ajuda Ministériu Saúde prepara an diak liután antes tempu udan.
Reprezentante WHO iha Timor-Leste, Arvind Mathur, hatete ekipamentu ne’ebé WHO fornese sei uza atu prevene no kontrola moras dengue, liuliu iha eskola no komunidade.
Nia hatete, Abate no Malathion sei suporta programa kontrolu vetor ne’ebé implementa liu husi servisu integradu entre Ministériu Saúde no Ministériu Edukasaun.
“Primeiru sei haforsa prevensaun dengue no kontrolu vetor iha Timor-Leste tomak, enkuantu segundu sei apoia promosaun saúde no nutrisaun liu husi eskola,” dehan Arvind.
Apoiu WHO ho KOICA ne’e inklui Abate 6.000 kilograma no Malathion 3.100 litru, ne’ebé entrega ba Ministériu Saúde hodi hametin intervensaun kontrolu vetor.
Arvind hatete, apoiu ne’e sei ajuda prevensaun dengue iha eskola no komunidade liu husi hamenus populasaun susuk. Nia mós subliña importánsia kontrolu vetor, konsiénsia komunidade no asaun sedu tanba risku dengue bele aumenta ho mudansa klimátika no ambientál.
Aleinde ekipamentu kontrolu dengue, WHO mós entrega pakote promosaun saúde no nutrisaun ba eskola sira, inklui pasta no kantil, atu apoia edukasaun kona-ba hahán saudavel no dieta.
Nia hatete, hahalok no toman ne’ebé influensia saúde hahú forma desde idade kiik, tanba eskola sai ambiente importante atu promove hahán saudavel, atividade fizika no toman diak.
Materiál sira ne’ebé entrega sei suporta kampaña nutrisaun eskolar, atividade promosaun saúde, divulgasaun no envolvimentu parte interesada sira, ho lideransa Ministériu Saúde no kolaborasaun Ministériu Edukasaun.
Arvind hatete, parseria entre Ministériu Saúde, Ministériu Edukasaun, KOICA no WHO importante atu promove saúde no moris diak ba povu Timor-Leste.
Enkuantu Diretora Nasional Nutrisaun iha Ministériu Saúde, Rosye Bela Joana Benevides, hatete Diresaun Nasional Nutrisaun simu apoiu husi KOICA liu husi WHO atu apoia programa nutrisaun eskolar.
Nia hatete, programa saúde eskolar Ministériu Saúde liu husi Diresaun Kuidadu Saúde Primária implementa ona iha territóriu tomak, no programa nutrisaun ne’e sei aumenta edukasaun ba estudante sira.
“Ho ida ne’e, ami hakarak hahú edukasaun nutrisaun sedu ba oan sira iha eskola primária, atu sira bele simu informasaun kona-ba hahán diak no saudavel,” dehan Rosye.
Nia hatete edukasaun nutrisaun sei fó oportunidade ba estudante no komunidade atu hatene hahán ne’ebé diak no halo eskolla dieta ne’ebé saudavel.
Programa nutrisaun ne’e sei komesa iha munisípiu no eskola balun hanesan faze inisiál, antes habelar ba área sira seluk. Munisípiu no eskola ne’ebé sei tama iha faze inisiál seidauk determina definitivu.
(dom)
