DÍLI, STLTIMORLESTE.com — Tribunal Judisial Primeira Instánsia Dili (TJPID) aplika prizaun preventiva ba arguidu inisiál ZL no aprezentasaun periódika ba arguida QG.
Tribunal Judisial Primeira Instánsia Dili iha Kuarta-feira, 30 Setembru 2026, liu hosi despaisu iha prosesu primeiru interogatoriu, deside aplika medida prizaun preventiva ba ZL.
Enkuantu ba QG, Tribunal deside aplika medida aprezentasaun periódika, iha prosesu ne’ebé Ministériu Públiku akuzasaun kona-ba alegasaun krime ilísitu droga.
Akuzasaun ne’e Ministériu Públiku liu hosi Prokurador Matias Soares, halo bazeia ba Lei Númeru 2/2017 kona-ba Prevensaun no Kombate Krime Ilísitu Droga.
Despaisu Tribunal ne’e prezide hosi Juiz José Maria. Arguidu na’in-rua hetan asisténsia legal hosi advogadu privadu Januário Martins no Octávio Cardozo.
Hafoin despaisu, defeza liu hosi Advogadu Octávio Cardozo hateten katak parte defeza la aseita desizaun Tribunal no sei halo rekursu ba Tribunal Rekursu.
“Parte defeza sei halo rekursu tanba konsidera iha razaun jurídika atu rekore ba direitu arguidu sira,” dehan Octávio.
Nia hatutan katak, prosesu sei iha faze primeiru interogatoriu no seidauk tama ba faze meritu kauza, ne’ebé sei determina responsabilidade kriminal arguidu sira.
Tuir defeza, seidauk iha provas sufisiente atu hatudu katak arguidu na’in-rua mak distribui droga ka hetan benefísiu hosi atividade refere.
Antes ne’e, Prokurador Matias Soares husu Tribunal atu aplika prizaun preventiva ba ZL. Ba QG, Prokuradoria husu proibisaun ba ausénsia no kausaun US$ 5,000 to’o US$ 10,000.
Enkuantu parte defeza husu Tribunal atu aplika medida aprezentasaun periódika, kausaun no proibisaun ba ausénsia ba arguidu na’in-rua.
Prosesu ne’e envolve PCIC no SNI, ne’ebé detein sidadaun Xineza na’in-rua iha área Manleuana no Bebonuk, iha madrugada loron 27 Setembru 2026.
(ter)
