DILI, STLTIMORLESTE.com – Ministeriu Edukasaun (ME) garante iha ano letivu foun 2025 sei implementa farda eskolar iha eskola idak-idak.
Asuntu nee hatoo husi Ministru Edukasaun Interinu (ME), Domingos Lopes Lemos ba jornalista sira iha edifisiu Ian Martin Balide, Kinta nee (05/12/2024).
Nia dehan, uniforme aprovadu ona, hein publikasaun deit iha tempu badak.
“Neebe hau hanoin ohin loron ou aban karik bele publika ona iha Jornal Republika, nee duni garante tinan oin tenke implementa ona uniforme eskolar iha eskola idak-idak. Enjeral kor farda neebe mak sei laiha hitam putih, baibain deit, ninia kor mak ida nee, maibe ninia modelu buat sira nee hotu sei iha Jornal Republika tiha mak haree, no tenke iha ita nian simbolu kultura nee, ikus media sira mai hotu para iha lansamentu,” nia dehan.
Nia akresenta, bainhira iha lansamentu sei konvida media sira bele mai halo kobertura, tanba asuntu uniforme nee aprova ona, hein atu publika iha Jornal Republika hodi tinan oin bele implementa ona.
(jac)
