27 Marsu, Hahu Eleisaun Autoridade Governu Lokal

Primeiru Ministru (PM), Kay Rala Xanana Gusmão. (Foto: STL/Emerenciana Pinto)

DILI, STLTIMORLESTE.com – IX Governu Konstitusional hasai ona rezolusaun marka kalendariu hodi halo preparasaun ba eleisaun autoridade governu lokal, neebe monu iha 27 Marsu tinan nee.

Lia hirak nee hatoo husi Primeiru Ministru, Kay Rala Xanana Gusmão ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Bairo Pite, Kinta (16/01/2025).

Primeiru Ministru dehan, enkontru semanal ho Prezidente Republika hodi fo hatene Governu hasai ona rezolusaun marka kalendariu ba eleisaun autoridade governu lokal, aleinde nee fo hatene ba Prezidente saida mak halo iha semana ida nee no saida mak la halao.

“Hau informa ba Prezidente katak, horiseik hasai rezolusaun ida marka kalendariu ida, preparasaun eleisaun ba autoridade governu lokal,” dehan Xanana Gusmão.

Iha biban nee Primeiru Ministru hatete, eleisaun ba autoridade governu lokal laos realiza dala ida, maibe governu sei ba haree estrutura sira ho kapasidade teknika, no kumpri ona regra bele halo ona eleisaun depois kontinua ba fatin seluk.

Primeiru Ministru dehan, iha Marsu nee sei lao haleu Munisipiu hotu, hodi observa ba servisu neebe membru governu halo, ida neebe halo ona no ida neebe mak la halao sei bolu fo atensaun hodi hadia.

Nunee mos iha Konselhu Ministru hasai mos rezolusaun governu, neebe aprezenta husi Ministru Administrasaun Estatal, Tomás do Rosário Cabral, ba ezekusaun estratejia desentralizasaun administrativa no instalasaun orgaun reprezentativu poder lokal 2025-2028 nian, hetan mos aprovasaun.

Medida ida nee ho objetivu atu reafirma Governu nia determinasaun hodi konsolida estratejia desentralizasaun Administrativu, no kontinua prosesu instalasaun orgaun reprezentativu poder lokal nian.

Rezolusaun Governu ida nee estabelese planu anual sira husi 2025 too 2028, neebe inklui instalasaun servisu balkaun uniku iha territoriu nasional tomak, reforsu institusional autoridade munisípiu sira nian, regulamentu lei sira neebe relasiona ho poder lokal no atualizasaun baze-dadus resenseamentu eleitoral nian.

Rezolusaun ida nee revoga rezolusaun governu anterior nu. 45/2020, loron 9 Dezembru, no tama iha vigor iha loron ida hafoin nia publikasaun.

(eme)

Share it :

Leave a Reply

Your email address will not be published. Required fields are marked *