DILI, STLTIMORLESTE.com – FALINTIL – Forsa Defeza Timor Leste (F-FDTL) hamutuk ho família hodi matan-been simu matebian Grumete Reinaldo Ximenes iha Pontikais, Dili.
Tuir observasaun STL iha terenu, matebian too iha pontekais Dili simu direita husi Xefe Operasaun F-FDTL, Koronel João da Costa Esteves, Xefe CIMIC F-FDTL Tenente Koronel Valerio Valente, hamutuk ho ofisiais superior, ofisiais kapitaun, subarterno, sarjentu, prasas inklui família matebian.
Matebian Grumete Reinaldo Ximenes husi Komponente Naval, Unidade Fuzileiros neebe mak tiru aan ho arma M4 iha kuartu laran, iha postu Komponente Navál, iha Bairu Oébau, Suku Costa Sub-rejiaun Pante Makasar.
Entretantu matebian tiru aan ho arma M4, iha loron 10 fulan Junhu iha kuartu laran Postu Oébau, depois akontesimentu ida nee parte PNTL asegura kedas fatin no saude fo asisténsia ba matebian, nunee transporta kedas ba iha Mortuáriu Hospitál Referal Oekusi, nunee iha loron 11 fulan Junhu transporta fali ba iha Postu Naval Oébau, kontinua ba Portu Mahata Oekusi hodi transporta kedas ba iha Roo Berlin-Ramelau iha oras 17:00 PM hodi transporta matebian mai Dili.
Enkuantu iha loron 12 fulan Junhu oras 05:00 OTL dadersan nia isin mate too iha Portu Díli, kontinua kedas translada ba iha baze Komponente Naval Hera, hafoin misa requem iha Komponente Naval Hera, kontinua translada ba iha matebian nia rezidénsia iha Uma Knua Rata Inawai Postu Administrativu Laga, Munisípiu Baukau, hodi halao serimónia tuir kultura hafoin serimónia fúnebre ikus.
(jen)
