DILI, STLTIMORLESTE.com – Atu selebra festa Santo Antonio de Padua neebé monu iha loron 13 Junhu, sarani Motael realiza atividade oin-oin mak hanesan atividade espiritual nian iha Sakramentu Kazamentu, Batizmu, Primeira Komunaun, novena no Eukaristia, aleinde nee mos iha programa ekstra sira kadi kakutak nomos diskursu.
“Parokia Motael hili Santo Antonio sai mahein ba Parokia ida nee, iha kontestu selebrasaun festa mahein Parokia Santo Antonio Motael iha ninia atividades espiritual nia iha Sakramentu sira, Sakramentu Kazamentu Batizmu, Primeira Komunaun no Eukaristia, aleinde ida nee programa ekstra sira seluk mak ami halo programa kadi kakutak nomos diskursu,” hatete Amu Paroku Santo Antonio Motael, Pe. Guilhermino da Silva ba jornalista STL iha UCT Balide, Kinta nee (12/06/2025).
Pe. Guilhermino hatete, kadi kakutak nee ba labariik sira iha Sentru 15 nia laran no grupu kategorial neebe eziste iha Parokia Motael.
Maibe kategoria kadi kakutak ba nivel rua, nivel terseiru siklu no ensinu Sekundaria ba diskursu halo ba nivel universitariu joven hetan oportunidade atu halo diskursu.
Materia ba diskursu nian nee ami prepara materia nee mai husi dokumentu Santo Padre sira nian dokumentus ensiklika Santo Padre hakerek ami fo ba sira hili uza hodi prepara materia ba iha diskursu, ba iha kadi kakutak nia mos hanesan materia bibilia nomos istoria Santo Antonio nia no horseik too final ba kadi kakutak nian husi terseiru siklu no ensinu Sekundaria no lokraik nee ba final diskursu nia.
Pe. Guilhermino hatete, atividades sira neebe lao kapas liu-liu iha diskursu no kadi kakutak, tanba bele aumenta labarik no joven sira nia konhesimentu kona-ba dokumentu ensikklika neebe Papa sira fo nomos aumenta konhesimentu istoria Santo Antonio nia hahu husi moris too mate no too kanoniza nia sai Santo iha Igreja laran.
Tanba nee ba sira neebe tuir programa ida nee aumenta sira nia konhesimentu tantu kona-ba dokumentu bibilia nomos istoria Santo Antonio nia.
Iha Festa Santo Antonio nia labarik nain 300 resin simu Batizmu no Primeiru Komunaun labarik nain 600 resin nomos kazal sira halo ona sira nia preparasaun, maibe labele selebra sakramentu matrimoniu nee iha loron Santo Antonio nia, tanba tempu la too ba ami halo iha loron sira nee.
Misa Festa Santo Antonio de Padua aban sei hahu tuku 05.00 loraik neebe prezide husi Arsebispu Arkedioseze Metropolitana Dili, Dom Virgilio Cardeal do Carmo da Silva, SDB.
(joa)
