BAUKAU, STLTIMORLESTE.com – Projetu reabilitasaun estrada diresaun Gleno-Letefoho iha Munisipiu Ermera, daudaun iha ona prosesu laran, hein atu implementa.
“Estrada Ermera lo-loos nee kompetensia nasional nian, maibe hau transmite deit saida mak nasional sira hanoin tuir informasaun tempu badak sei asina kontratu, mais nee depende ba Ministeriu Obras Publikas,” hateten Prezidente Autoridade Munisipiu Ermera, José Martino dos Santos Soares ba STL iha Vila Antiga Baukau, bainhira partisipa programa asistensia teknika ba prestasaun servisu estrutura Autoridade Munisipal no Autoridade Administrativu Atauro iha Munisipiu Baukau, Kinta (12/06/2025).
Autoridade masimu ba Munisipiu Ermera nee katak, implementasaun projetu reabilitasaun estada refere depende ba Ministeriu Obras Publikas no Ministeriu Planeamentu Estratejiku no Dezenvolvimentu mak deside bainhira mak KAFI hateten sai rezultadu implementasaun.
Nia esplika, projetu reabilitasaun estrada refere neebe tuir planu Governu atu reabilita husi Gleno too Postu Administrativu Letefoho ho distansia kilometru liu 20.
“Ita haree husi kondisaun estrada dadaun nee presiza duni tau atensaun porque estrada nee grave liu ona fo impaktu ba mobilizasaun komunidade nian,” José akresenta.
Prezidente Autoridade Munisipiu Ermera nee katak, daudaun kondisaun estrada ligasaun husi Gleno ba Postu Letefoho kondisaun grave hodi difikulta movimentu transporte publiku hodi transporte komunidade sira nia produtu lokal aliende transfere pasiente husi Letefoho ba Gleno no Dili.
Tanba nee husu Ministeriu Obras Publikas atu aselera prosesu asina kontratu hodi orienta kompanhia mobiliza ekipamentus pezadu halo servisu, tanba dadaun komunidade Ermera hein promesa.
Entretantu tuir informasaun neebe Autoridade Munisipiu Ermera asesu, projetu refere sei responsavel husi kompanhia internasional no dadaun hein asina kontratu.
(tom)
