DILI, STLTIMORLESTE.com – Papel feto importante iha dezenvolvimentu nasional, tanba nee feto sira presiza kapasita aan hodi hasae kapasidade hodi kontribui iha konstrusaun Estadu.
Kestaun nee hatoo husi Feto Potensial, Merlinda Soares Pinto de Aquino ba jornalista STL iha nia knaar fatin Timor Plaza, Sesta (13/06/2025).
Nia hatete, Feto atu sai ativu iha dezenvolvimentu nasional saida mak feto sira presiza kapasita aan.
“Feto sira presiza halo sai ativu no kontribui liu tan iha dezenvolvimentu nasional mak presiza hasae kapasidade (Empowerment) iha area edukasaun, feto sira presiza hetan edukasaun neebe diak husi nivel primiariu too universitariu hodi iha kapasidade masimu bele partisipa ativu iha prosesu dezenvolvimentu,” dehan Feto Potensial nee.
Feto Potensial nee dehan, Treinamentu Profisional, partisipa iha kursu profisional kona-ba Agrikultura, Negosiu, Teknolojia, Setor Governamental, Envolvimentu Politiku no Sosial, Partisipasaun feto iha Lideransa, feto sira presiza oportunidade atu tama iha lideransa politika, komunidade no guvernu. Laos mane deit mak bele maibe feto mos bele, sai Advogadu Direitu Feto, Kampanha ba direitu feto, protesaun husi violensia no promosaun igualdade jeneru,” katak nia.
“Feto maluk sira, ita hotu iha potensial, kontinua aprende hodi hasae ita nia abilidade hodi atinji futuru neebe naroman. Labele para, kontinua estuda nunee bele hatudu ita nia kapasidade hodi fo kontribui hanoin konstrutivu sira neebe halo mudansa ba iha ita nia komunidade no nasaun.
Nunee mos Diretora Interina Fundasaun Caucus Feto ba Politika, Julieta Fereira da silva husu feto sira nafatin partisipa iha atividade hotu nunee bele partisipa iha dezenvolvimentu nasional.
“Ami nia mensajen ba feto maluk sira katak, liu-liu sira iha partidu politiku atu kompete iha eleisaun liu-liu iha eleisaun lokal neebe mai no dezetralizasaun poder lokal nia ami husu para feto sira atu asesu ba informasaun hotu-hotu atu bele hatene saida mak bele dezentralizasaun nomos poder lokal hodi kompete iha neeba,” dehan Diretora Interina Fundasaun Caucus.
Diretora Interina dehan, feto nafatin kapasita aan iha partidu politiku nunee bele asumi kargu ruma hodi bele foti desizaun.
(eme)
