DILI, STLTIMORLESTE.com – Kandidatu profesores neebe antes nee koloka ona ba iha Munisipiu Likisa, iha fulan hirak liu ba nain 10 husu muda fatin, maibe Servisu Edukasaun Munisipiu (SEM) Likisa la autoriza, tanba sirkular husi ministra fo sai ona.
Julio da Silva nuudar Diretor Servisu Edukasaun Munisipiu Likisa hatoo kestaun nee ba STL liu husi telefone, Sesta nee (13/06/2025).
“Ita nian profesores balun mai duni, maibe labele tanba ita iha tiha ona despaisu husi Ministra mai fali PAM. Kuaze iha nain 10 resin, hau ladun fiksa didiak, sira nee husi nivel Edukasaun Pre Eskolar no Ensinu Baziku, Pre Eskolar nain rua ou tolu, sira mai husu atu muda nee iha fulan Marsu tinan nee, maibe ami la autoriza, tanba ho despaisu neebe Ministra fo sai ona,” dehan nia.
Julio akresenta, agora daudaun sira mantein iha nee nafatin hodi halao sira nian knaar hanesan profesores, kada loron ba eskola fo aprendizajen ba estudantes sira, tanba sira nee hanorin iha edukasaun pre eskolar no ensinu baziku.
Iha fatin seluk, Diretor Servisu Edukasaun Munisipiu Ainaro, Patricio da Costa Magno hatete, tanba agora daudaun profesores hirak nee halao knaar iha eskola lao hanesan baibain, liu-liu iha eskola neebe sira hanorin ba, nee duni too ohin loron sira seidauk mai iha SEM Ainaro hodi hatoo sira nian difikuldade ruma, maske balun hela kost no balun komunidade mak fo fatin ba sira hela.
“Ita nian profesores neebe mak antes nee koloka ona mai iha nee too agora seidauk mai kestiona sira nian difikuldade ruma, tanba balun agora daudaun hela iha komunidade nian uma, sira balun kost, ninia kuantidade hela iha kost nee mak ita seidauk hatene hira. Kuandu husu muda ita la fo ona, tanba sirkular Ministra hasai ona,” dehan nia.
Patricio dehan, labele muda ema arbiru, liu-liu bolsa kandidatu neebe mak atu muda nee la autoriza ona, tanba karta iha ona husi Ministra, tanba antes nee husi Ministeriu koloka ona sira mai iha nee.
(jac)
