DILI, STLTIMORLESTE.com – Governu Timor Leste hatoo sentidu kondolensia no laran susar ba trajedia neebe akontese iha loron Kinta (12/06/2025) iha sidade Ahmedabad, India, iha neebe aviaun Air India neebe atu ba Londres monu la kleur hafoin dezlokasaun, hodi hamate pelumenus ema nain 241.
Iha aviaun nia laran iha ema nain 242, husi ema nain hira nee iha pasajeiru nain 230 no tripulante nain 12 husi nasionalidade oin-oin, inklui sidadaun indianu nain 169, sidadaun Britaniku nain 53, sidadaun português nain 7 no sidadaun kanadianu nain 1.
Governu Timor lamenta tebes ho lakon vida umanu sira no hatoo sentidu kondolensia ba familia sira husi vítima sira husi asidente trajiku nee, neebe marka epizodiu ida neebe devastador liu iha aviasaun sivil iha dekada sira ikus nee.
“Governu Timor Leste manifesta nia solidariedade ho Governu no povu India nian iha tempu lutu koletivu ida nee, no hatoo mos solidariedade ida nee ba Governu Reinu Unidu, Portugal no Kanada, neebe nia sidadaun sira entre matebian sira,” haktuir nota komunikadu neebe STL asesu husi governu, Sesta (13/06/2025).
Ministru Prezidensia Konselhu Ministru (MPKM), Agio Perreira lori Governu Timor Leste nia naran hatoo sentidu solidariedade ba Primeiru Ministru India Narendra Modi no povu indianu ba trajedia nee.
“Ho laran susar makaas katak Governu Timor Leste simu notisia kona-ba dezastre aereu iha Ahmedabad, akon ema barak nia vida. Ami espresa ami nia solidariedade sinseru liu ba Primeiru Ministru Narendra Modi no povu indianu, no mos ba familia sira husi vitima sira hotu husi trajedia ida nee,” nia hakotu.
(alb)
