DILI, STLTIMORLESTE.com – Tribunal Judisial Primeira Instansia Dili halao prosesu Primeiru Interogatoriu ba arguida ho inisial SE, tanba deskonfia komete krimi hasoru lezada inisial C.
Arguida lori mai Tribunal, no Ministeriu Publiku promove arguida mai iha Tribunal ho krimi tentativa omisidiu no ofensa integridade fizika simples no mos Arma Branka.
Halo tiha identifikasaun ba arguida, ikus mai Tribunal deside hodi aplika medida Aprezentasaun Periodika ba arguida.
“Tribunal aplika Medida Aprezentasaun Periodika ba arguida atu aprezenta an iha Eskuadra Polisia neebe hela besik ba fulan ida dalan rua,” dehan Defeza Eustaquio Guterres ba jornalista sira iha Kaikoli, Sesta (13/06/2025).
Nia hatutan, Ministeriu Publiku promove krimi tolu ba iha arguida, maibe defeza haree katak prosesu nee foin inisiu no primeiru interogatoriu, sei presiza halo investigasaun klean liu tan.
Sublina, iha alegasaun defeza husu ba iha Tribunal atu aplika medida Aprezentasaun Periodika, tanba nee mak ikus mai Tribunal haree faktus hotu hodi deside aplika medida Aprezentasaun Periodika ba arguida.
Reforsa, motivu husi problema nee tanba deskonfia arguida nia laen, tanba nee mak ikus mai mosu problema.
No tuir informasaun neebe iha katak, kazu nee akontese iha loron 11 fulan nee, depois mak arguida lori ba iha Tribunal.
Prosesu nee prezide husi Juiz turnu Jumiati Freitas, Ministeriu Publiku reprezenta husi Prokurador, arguidu hetan asistensia legal husi Defensor Publiku, Eustaquio Guterres.
(ter)
