DILI, STLTIMORLESTE.com – Prezidente Republika José Ramos Horta hatoo sentidu kondolensia ba India hafoin trejedia Voo Air India AI171.
Prezidente no Laureadu Nobel ba Pas, Jose Ramos Horta, espresa nia tristeza profunda no hatoo nia sentidu kondolrnsia ho laran-luak ba Índia hafoin dezastre trajiku husi aviaun Air India AI171 besik Aeroportu Ahmedabad iha loron 12 fulan-junu tinan 2025.
Aviaun, neebe iha dalan husi Ahmedabad ba Aeroportu Gatwick Londres nian monu iha oeste India, rezulta ema barak mak lakon sira-nia vida no afeta pasajeiru nasionalidade oin-oin.
Iha karta ida neebe diriji ba Honoravel Prezidente Republika Índia nian,. Smt. Droupadi Murmu, iha loron 12 fulan Junu tinan 2025, Prezidente Ramos-Horta hatete iha lutu metan nee Prezidente lori povu Timor Leste nia naran hatoo sentidu kondelensia.
“Iha momentu lutu no tristeza ida nee, hau hakarak hatoo hau nia kondolensia ho laran-luak ba Vossa Exelensia, ba Governu, ba povu India, no liu-liu ba família enlutada sira neebe lakon sira nia familia neebe sira hadomi iha katastrofe devastadora ida nee,” dehan PR Horta husi komunikadu neebe STL asesu, Sesta nee (13/05/2025).
Prezidente hatete Timor Leste nia solidariedade ho família hotu-hotu neebe afetadu no louva autoridade Índia nian sira-nia esforsu iha halo operasaun salvamentu no fo asistensia ba sobrevivente sira.
President mos rekonese profisional saude sira neebe responde ba emerjensia no fo apoiu ba sidadaun nasionalidade sira seluk neebe iha Voo ida nee.
Prezidente Ramos-Horta sublina katak Timor Leste kontinua akompanha situasaun ho empatia no preokupasaun bainhira Índia servisu hodi fo kuidadu ba sobrevivente sira no apoiu ba sira hotu neebe afetadu hosi trajedia ida nee.
Prezidente hatoo ona Timor Leste nia solidariedade neebe klean liu no deseju ba forsa no serenidade ba Governu no povu Índia iha tempu susar ida nee.
(eme)
