DILI, STLTIMORLESTE.com – Deputadu Jose Virgilio Rodrigues Fereira preokupa ho kompanhia Mira Mart neebe mak ameasa populasaun iha Tasi-Tolu tan deit rai neebe mak kompanhia hakarak foti hotu.
Lia hirak nee hatoo husi Bankada CNRT, Deputadu Jose Virgilio Rodrigues Ferreira ba jornalista sira iha plenaria Parlamentu Nasional, Segunda (16/06/2025).
“Problema ida iha Tasi Tolu, iha kompanhia Mira Mart neebe mak amesa ita nia populasaun sira tanba deit rai ida neebe mak kompanhia hakarak precisa foti hotu kedas,” dehan Deputadu Jose.
Nia mos husu ba ministeriu relevante hodi bele haree ba aktus neebe mak kompanhia Mira Mart halo ba populasaun iha area Tasi-Tolu.
“Husu ba Ministeriu relevante haree ba asuntu ida nee, tanba populasaun oituan neeba nee sai vitima ba kompania Mira Mart uza polisia ba ameasa sira, depois lori kontainer boot ida taka tiha ba estrada,” tenik Deputadu Jose.
Deputadu nee dehan, ikus mai kompanhia Mira Mart halo ona fatin torturasaun ba populasaun sira iha Tasi-Tolu no ameasa tau kontainer hodi satan sira labele sai husi fatin ida neeba.
“Sira kontaktu hau rasik tun ba, hau sente komunidade nee presiza duni ita nia tulun, tanba rai ida iha neeba nee sei prosesu hela iha Tribunal, maibe rai nee iha 2014 la sala sira mak manan ba rai ida nee,” dehan nia.
Entretantu hatan ba deputadu sira nia preokupasaun nee fo ba tenkiku sira iha Parlamentu Nasional (PN) anota hela hodi hatoo ba parte relevante sira hodi bele haree ba asuntu ida nee
(EST 1)
