DILI, STLTIMORLESTE.com – Bankada CNRT, Deputadu Virgilio Pereira husu ba Ministeriu Komersiu no Industria (MCI – sigla português) atu tau atensaun ba Xineza sira neebe mak loke loja iha bairu sira, tanba bele hamate Timor oan sira neebe mak hakarak atu faan.
Lia hirak nee hatoo husi Bankada CNRT, Deputadu Virgilio Pereira ba jornalista sira iha plenaria Parlamentu Nasional (PN), Segunda (16/06/2025).
“Hau husu ba MCI atu bele toma atensaun Xineza sira neebe mak oras nee daudaun loke loja nee too tama bairu sira, ida nee perigozu tebes ba ita nia Timor oan sira neebe mak hakarak atu faan sasan iha bairu sira,” dehan Deputadu Virgilio.
Nia fundamenta, wainhira Xineza sira ba loke loja tama too iha bairu sira, ida nee signifika katak ita hamate tiha ona ita nia komunidade sira neebe mak loke kios.
Deputadu nee mos husu ba MCI atu toma hela nota ba asuntu ida nee, tanba Xineza sira bele hamate Timor oan sira ninia ekonomia.
“Favor ida husu ba MCI atu toma hela nota ba asuntu ida nee, nunee haruka ekipa sira pelumenus tun ba hodi haree netik iha bairu-bairu sira neebe oras nee daudaun Xineza sira tama too iha neeba, entermus de ekonomia ita bele dehan katak Xineza bele hamate Timor oan tomak ninia ekonomia,” nia hakotu.
Entretantu hatan ba deputadu sira nia preokupasaun nee fo ba tenkiku sira iha Parlamentu Nasional (PN) anota hela hodi hatoo ba parte relevante sira liu-liu ba iha MCI hodi haree ba asuntu nee.
(EST 1)
