DILI, STLTIMORLESTE.com – Deputada Helena Martins husi Bankada FRETILIN hateten, ponte Gomilafa iha Suku Lavateri, Postu Administrativu Baguia, Munisipiu Baukau, wainhira ponte nee kotu mak populasaun sira husi diresaun entre Baguia no Baukau sei labele asesu ba estrada.
Lia hiirak nee hatoo husi Deputada Helena Martins husi Bankada FRETILIN ba jornalista sira iha plenaria Parlamentu Nasional (PN), Segunda nee (16/06/2025)
“Iha infraestrutura neebe mak kontinua lentu nafatin liu-liu iha Postu Administrativu Baguia, Munisipiu Baukau no iha ponte Gomilafa iha Suku Lavateri entre Atelari nian, iha semana ida ka rua mak ponte nee kotu diresaun entre Baguia ho Baukau labele asesu ba estrada,” dehan Deputada Helena Martins.
Deputada nee mos husu ba parte relevante sira liu-liu Ministeriu Obras Publika (MOP) buka solusaun atu halo lalais projetu sira neebe daudaun nee lao hela, projetu balun neebe lao uluk ona laiha liu kualidade, nunee komunidade sira kestiona kona-ba projetu refere.
Iha fatin hanesan, Deputada Maria Angelina Sarmentu husi Bankada PLP hatutan, kompanhia la konsidera ponte kiik no estrada sira neebe mak halo uluk, aban bainrua udan boot bee bele afeta fali ba populasaun sira viajen, suku ida ba suku seluk.
“iha Postu Administrativu Likidoe, estrada agora daudaun lao hela iha kruzamnetu nia, maibe kompanhia la konsidera mos ponte kiik sira neebe mak halo uluk ona, entaun aban bainrua udan boot bee bele afeta fali ba populasaun sira,” tenik Deputada Angelina.
Deputada Angelina sublina, estrada tun ba iha Bereliurai aat tebes ona nunee sira husu atu tau atensaun ba iha estrada refere, tanba udan sei la ajuda trasporte publiku sira lori produtu lokal sira hanesan modo no aifuan asesu ba merkadu.
Nunee mos Deputadu Virgilio Pereira husi Bankada CNRT mos Kestiona estrada urbana Baukau neebe pur volta 23 kilos neebe mak ninia orsamentu nee preve tiha ona iha 2025, mas ate agora seidauk iha informasaun ruma neebe relasiona ho asuntu ida ho estrada urbana munisipiu Baukau nian.
“Estrada diresaun husi Nagardjo tun ba too PLN nee grave tebes, tanba nee presiza tau atensaun, nunee liu husi fatin ida nee bolu nafatin ba MOP konsidera ida nee hanesan mos asuntu importante ida ba povu iha munisupiu Baukau,” nia hakotu.
Entretantu hatan ba deputadu sira nia preokupasaun nee fo ba tekniku sira iha Parlamentu Nasional (PN) anota hela hodi hatoo ba parte relevante sira liu-liu ba iha MOP hodi bele haree ba asuntu nee.
(EST 1)
