DILI, STLTIMORLESTE.com – Embaixadora Australiana ba asuntu Asosiasaun Nasaun Sudeste Aziatiku (ASEAN) vizita Timor Leste (TL) hodi hametin parseria no apoiu mos TL.
Embaixadora Australia ba Asosiasaun Nasaun ASEAN, Tiffany McDonald, vizita Timor Leste husi 16-18 Junhu ba envolvimentu importante sira neebe foka ba ita nia parseria hodi apoia Timor Leste nia adezaun tomak ba ASEAN.
Durante nia vizita, Embaixadora McDonald sei hasoru malu ho Prezidente Republika, Jose Ramos Horta, Vise Ministra ba Asuntu ASEAN, Milena da Costa Rangel, membru sira husi korpu diplomatiku, lider foinsae Timoroan no bolseiru sira husi programa bolsa estudu Australia.
Embaixadora McDonald dehan katak ninia vizita ida nee sei sai oportunidade ida atu diskuti kona-ba parseria.
“Ami nia parseria no prioridade neebe ami fahe hamutuk hodi apoia ba rejiaun ida neebe maka pasífiku, estavel no prosperu,” katak embaixadora bainhira remata halo enkontru ho Prezidente Republika iha Palasiu, Segunda (16/06/2025).
Australia durante nee fo apoiu ba Timor Leste atu kumpri ASEAN nia rekizitu sira ba adezaun ba ASEAN nian liu husi pakote asistensia milhaun US$ 11.8 neebe inklui treinamentu lian Ingles atu harii Timor Leste nia kapasidade institusional hodi envolve ho mekanizmu ASEAN nian.
Apoiu konsultivu no inisiativa kapasitasaun ba Ministeriu Negosiu Estranjeiru no Kooperasaun (MNEK). Hasae kapasidade hodi apoiu Polísia Nasional Timor Leste (PNTL) hodi kumpri obrigasaun seguransa ASEAN nian. Programa dezenvolvimentu setor privadu ida neebe sei hametin komersiu no investimentu husi Australia no rejiaun ASEAN nian. Parseria ho Standard Australia atu haforsa sistema padronizasaun nasional sira.
Australian Bureau of Statistics fo apoiu Timor Leste hodi prienxe rekizitu estatístika ekonomiku ba adezaun sai membru ASEAN nian. Treinamentu Sekretariadu ASEAN nian ba funsionariu Timor Leste sira kona-ba prosesu ASEAN nian.
Australia nia inisiativa emblematika neebe halao hela parseria ho ASEAN mak hanesan Australia Comprehensive Strategic, Aus4ASEAN Futures – neebe fo mos apoiu ba ofisial Timor Leste sira iha atividade, formasaun no eventu hotu-hotu.
Embaixadora McDonald hateten, “Timor-Leste nuudar lian importante ida iha ita-nia rejiaun no iha forum multilateral sira, inklui ASEAN. Australia sente orgulhu sai nuudar apoiante kleur ona ba Timor-Leste nia ambisaun atu sai membru ASEAN nian.
(eme)
