BAUKAU, STLTIMORLESTE.com – Komando Polisia Munisipiu Baukau sei prosesu kazu asindente neebe akontese iha Suku Sagadate, Postu Administrativu Laga, neebe rezulta vitima Grasiano Antonio Ximenes mate fatin ba Ministeriu Publiku (MP).
Komandante Interinu Komando Polisia Munisipiu Baukau, Superintendente João Sancho Pires esplika, asindente nee akontese iha loron 16 Junhu, pur volta tuku 04:30 loraik.
Tuir kronolojia vitima Grasiano Antonio Ximenes idade 26, konduz motor mio sapa matrikula Y.5179 diresaun husi Laga ba Sagadate no kareta fuzu husi kompanhia Norinco International Cooperation neebe responsabiliza projetu reabilitasaun estrada Laga-Baguia diresaun husi Baguia, neebe hasoru malu iha kruzamentu Suku Sagadate rezulta vitima mate fatin, tanba deskonfia vitima ho motor soke kareta husi roda kotuk parte loos no vitima monu tama roda okos hafoin kareta sama vitima nia ulun.
“Ita nia tranzitu ba duni fatin akontesimentu, Polisia nia servisu rekolha entrega mate isin ba familia, lori suspeitu mai Komando para ita prosesu ba Ministeriu Publiku,” hateten João Sancho Pires ba jornalista sira iha Vila Nova Baukau, Tersa (17/06/2025).
Nia sublina, motivu ba asidente nee seidauk hatene klaru, maibe haree ba akontesimentu vitima monu tama roda okos hafoin kareta sama, tanba nee Polisia nafatin servisu rekolha evidensia sira liu husi investigasaun Tranzitu nian hafoin aprezenta ba Ministeriu Publiku.
“Ulun mak fera bele monu tama sama iha leten, nain hira hetan ona foto balun prosesu lao nafatin, ita sei halo investigasaun klean liu ba kazu ida nee, tanba motor kareta ita foti, ba Ministeriu Publiku mak haree,” João Sancho Pires hateten.
Evidensia hanesan kareta no motor daudaun asegura ona iha edifisiu Komando Polisia Munisipiu Baukau no kondutor neebe konduz kareta fuzu husi kompanhia Norinco daudaun asegura iha edifisiu Komando Polisia Baukau.
(tom)
