DILI, STLTIMORLESTE.com – Polisia Nasional Timor Leste (PNTL) liu husi Komando Munisípiu Dili halo ona kapturasaun ba suspeitu nain 2 ho inisial A.S no A.S neebe mak involve kazu tentiva omisidiu hodi sona vitima ho naran konhesidu Alito Mambo iha loja ida nia oin iha area Audian iha loron Domingu (15/06/2025) foin lalais.
Tuir gravasaun video husi CCTV neebe STL asesu katak, kazu nee akontese bainhira suspeitu ho vitima diskute malu, tanba problema partikular balu, nunee ikus mai suspeitu deside tuku vitima hodi monu tun ba rai no lori mos tudik hodi sona vitima iha nia kabun.
Nunee, iha akontesimentu nee husi Autoridade Seguransa too kedas fatin hodi halo evakuasaun vitima ba iha Hospital Nasionál Guido Valadares (HNGV) hodi halo tratamentu ba nia saude.
Iha fatin ketak, Komandante Munisípiu Díli (KMD), Superintendente Xefe Polísia Orlando Gomes informa katak, kona-ba kazu tentativa omisidiu no arma branka neebe akontese foin lalais, husi autoridade seguransa asegura ona suspeitu sira.
Nia dehan, iha fatin akontesimentu nee, autoridade seguransa la konsege kaer kedas suspeitu, tanba depois sona vitima nee suspeitu deside halai lakon husi fatin nee.
“Suspeitu sona ita nia vitima nia kabun mamar parte karuk nian no iha momentu neeba kedas ita nia vitima evakua kedas ba iha HNGV hodi halo tratamentu ba nia saude, tanba suspeitu halai ses aan husi fatin akontesimentu,” nia esplika.
Nia informa, suspeitu neebe halai lakon, nia dehan iha loron Tersa (17/06/2025 ohin ekipa konjunta husi forsa Polísia nomos Servisu Nasional Intelijensia (SNI) servisu konjunta ho Raina inklui Makikit no J2 hodi servisu hamutuk konsege kaptura ona suspeitu nain 2 ho sexo mane.
“Lori mai entrega ona iha ita nia parte investigasaun hodi halao hela prosesu no ita nia suspeitu ami asegura hela iha Komando para nunee bele kontinua halao nia prosesu kontinua ba oin,” nia deklara.
Nia hatutan, servisu konjunta husi Autoridade Seguransa kaptura ona suspeitu nain 2, maibe sei buka tan suspeitu seluk neebe involve hotu iha kazu tentativa omisidiu no arma branka nee.
Enkuantu, tuir informasaun neebe autoridade seguransa rekolha katak, kazu nee akontese tanba problema hadau malu feto (namorada), nunee ikus mai suspeitu la satisfas hodi sona vitima.
“Kazu nee nia motivu hadau malu feto, tanba nee mak ikus mai sona malu. Nunee ita kaptura ona suspeitu nain 2 no halo ona identifikasaun, no daudaun nee suspeitu nain 2 asegura hela iha parte prosesu investigasaun no ami nia ekipa nafatin halo monitorizasaun atu nunee ita bele haree kazu sira nee ba oin,” nia koalia.
Entretantu prosesu ba kazu tentativa omisidiu no arma branka nee PNTL sei submete rezultadu investigasaun ba iha Ministeriu Publiku (MP) ho evidensia no provas sira neebe rekolha ona, nunee bele prosesa ba oin tuir lei neebe mak iha TL.
(jen)
