DILI, STLTIMORLESTE.com – Primeiru Ministru (PM), Kay Rala Xanana Gusmão ho Embaisador Irlanda Padraig Francis diskute kona-ba servisu Governu Timor Leste (TL) nian, no esforsu sira neebe daudaun nee lao hela atu TL sai prosperu liu tan, nomos diskute kona-ba TL ninia adezaun ba ASEAN.
Lia hirak nee hatoo husi Embaixador Irlanda Padraig Francis ba jornalista sira hafoin halo enkontru despedida ho Primeiru Ministru (PM), Kay Rala Xanana Gusmão iha Palasiu Governu, Dili, Tersa (17/06/2025).
“Ami diskute servisu Governu Timor Leste nian no esforsu sira neebe halao daudaun atu halo Timor Leste sai prosperu liu tan, no liu-liu ami diskute ba TL ninia adezaun ba ASEAN neebe sei mai, ida nee mak buat ida neebe hau hanoin sei sai importante tebes, laos deit ba Timor Leste maibe mos ba ASEAN,” tenik Padraig Francis.
Embaixador Irlanda Padraig Francis sublina, vizita despedida ida nee hanesan previleiju no onradu atu hasoru malu ho Primeiru Ministru (PM) Kay Rala Xanana Gusmão no sei diskute kona-ba relasaun sira entre nasaun rua nee.
“Hau Padraig Francis, Embaixador Irlanda nian mai Timor Leste, no agora daudaun nee hau hetan ksolok no onra atu hasoru malu ho Primeiru Ministru, no hau hakarak dehan deit katak Irlanda iha afetu boot tebes ba Timor Leste,” katak Padraig Francis.
Nia afirma, ligasaun istoriku sira neebe fila fali ba periodu revolusaun no libertasaun nian no povu Irlanda sempre fo apoiu makaas ba luta Timor Leste nian, antes nia sai independente tomak no depois.
“Hau nia vizita iha nee mak parte ida husi ida nee, ami hakarak mantein nafatin kontaktu regular ho Timor Leste, ida nee hanesan vizita despedida ida atu kaer tomak Timor Leste nia responsabilidade iha ASEAN presiza ema di’ak no servisu ho diak,” nia fundamenta.
Nia salienta, Timor Leste lori tradisaun demokrasia ida neebe forte no respeitu ba direitus umanus, hanoin katak ida nee sei sai lian ida neebe importante tebes haleu iha ASEAN nia meza, Timor Leste bele nasaun kiik ida hanesan Irlanda, maibe Irlanda sente iha responsabilidade atu halao parte iha mundu, no fiar aan tebes katak Timor Leste sei kontinua halao nunee.
“Hau hanoin buat ruma neebe Irlanda bele halo mak primeiru enkoraja Timor Leste, maibe mos ita haree atu fo formasaun barak liu tan ba ema sira iha Timor Leste, ami iha ona programa Bolseiru Irlandia ida neebe estudante Timor Leste bele ba Irlanda. Hau hanoin importante se Timor Leste atu kumpri nia responsabilidade iha ASEAN katak kapasidade funsionariu sira presiza hasae no ida nee buat ida neebe ita bele ajuda,” dehan Francis.
(EST 1)
