DILI, STLTIMORLESTE.com – Ministeriu Saude (MS) liu husi Institutu Nasionál Saúde Públika Timor Leste (INSP-TL) halao ona medida preventiva hodi hasoru variante foun NB.1.8.1 neebe daudaun nee sai preokupasaun husi nasaun sira iha mundu inklui Timor Leste (TL).
Nia dehan, bazeia ba orientasaun husi MS hasai ona sirkular ida tau iha pájina Palásiu Sinzas nian oin atu lao tuir halo prevensaun bá iha variante foun NB.1.8.1 nian.
“Ita nia MS fo sai ona sirkular oinsa ita atu halo prevensaun variante foun ho NB.1.8.1 liu ba pontu entrada sira, tanba ita haree iha nasaun Vizinhu, Singapura, Malazia, Australia, Tailándia nomos India, ita haree kazu barak, pasiente barak baixa, nunee ita foti medidas preventiva, ita laos halo tau povu maibe ita halo asaun preventiva atu nunee ita nian populasaun labele hetan moras variante foun nee,” hatete Diretór Jeral INSP-TL, Nevio Sarmento ba jornalista sira iha salaun INSP-TL Komoro Dili, Segunda (23/06/2025).
Nia esplika, asaun preventiva neebe MS fo mak tenke fase liman beibeik ho sabaun, nomos uza fila-fali máskara atu nunee bele halo prevensaun ba variante foun NB.1.8.1.
“Ita nia kobertura ba vasinasaun 80% ida nee salva tebes-tebes, ida nee hanesan asaun preventiva ida ita bele salva ita populasaun hotu husi moras, tanba nee mak ita nia MS foti ona asaun preventiva ida atu prevene ita nia povu ba variante foun,” nia deklara.
Nia informa, ekipa sira prontu hela hodi atende ba variante foun, tanba uluk Timor Leste hasoru situasaun Covid-19 iha tempu neeba.
“Iha lisaun boot dezde tinan 2020 too 2021 nee ita hakat liu situasan Covid-19, agora ita prontu mos hodi hasoru variante foun nee mosu iha ita nia rain, tanba nee mak ekipa sira prontu atu reativa fila-fali wainhira kazu sira iha fila-fali,” nia hatutan.
Antes nee eeprezentante Organizasaun Mundiál Saúde (OMS) iha Timor Leste, Ervindo Mathur dehan, variante foun Covid-19 neebe konhesidu ho NB.1.8.1 neebe avita daudaun nasaun sira hanesan Índia, Bangladesh no Tailándia, ladun iha impaktu hanesan ho surtu Covid-19.
Nia relata, variante foun bele kontrola no prevene liu husi uza máskara, fase liman, ijiene no sensibiliza informasaun ba komunidade sira.
“Ita haree iha posibilidade ba variante foun neebe tama iha TL, maibe kontinua iha alerta ba kazu foun sira Covid-19 nian,” nia deklara.
Nia afirma, kapasidade laboratóriu nasionál ida atu halo teste, karik variante foun nee mosu iha nasaun ida nee.
(jen)
