DILI, STLTIMORLESTE.com – Profesores ba area produtu iha Eskola Sekundáriu Téknika Vokasional ba Indústria no Teknólojia (ESTV-IT) 28 Novembru Bekora sei menus.
“Profesores ba produtivu mak menus ou area espesifiku mak menus, mais area sientifiku ho sosio kultura barak liu ona. Dala ruma sei muda profesores sientifiku no sosio kultura balun ba fatin neebe presiza ou eskola seluk neebe presiza,” dehan Diretor Eskola Sekundáriu Téknika Vokasional ba Indústria no Teknólojia (ESTV-IT) 28 de Novembru Bekora, Tomas Pinto ba jornalista STL iha nia knaar fatin Bekora. Segunda nee (23/06/2025).
Nunee mos Diretor Nasional Ensinu Sekundariu no Tekniku Vokasional, Fernando Mouzinho Gama dehan, ensinu tekvo balun sei menus profesores ba area produtivu, maibe ho rekrutamentu daudaun nee ba ensinu tekvo bele resposta ba eskola balun neebe sei menus profesores.
“Ita nian ensinu tekvo balun sei menus profesores ba area produtivu, maibe ho rekrutamentu daudaun nee ba ensinu tekvo bele resposta ba eskola balun neebe sei menus profesores, tanba nee ba oin presiza aumenta profesores ba tekvo balun menus profesores,” dehan nia.
Iha fatin seluk, Aniceto Berlelo hanesan Diretor ESJ FINANTIL dehan, profesor neebe mak menus nee ba iha disiplina, nee fleksibilidade profesor sira neebe hanorin iha materia, ezemplu iha neeba materia multi media, maibe durante nee la abandona estudantes sira iha sala, tanba profesores neebe hanorin disiplina matematika nee tenke ba hanorin iha multimedia, ida nee iha fleksibilidade.
“Tuir lei, kurikulu profesores sira neebe mak hanorin nee tenke tuir duni idak-idak nian area espesialidade, se profesores ba area matematika nee tenke ba area matematika, tanba ida nee mak husi ministeriu rasik sempre fo hatene ba profesores sira neebe mak hanorin nee tenke tuir idak-idak nian area espesialidade,” dehan Aniceto.
Nia dehan, ida nee laos husi ME mak la prepara, maibe ema mak too agora seidauk hatama ninia vaga ba iha ME para rekruta, tanba nee ba disiplina multimedia no desportu, rua nee koalia kona-ba espesialidade nee seidauk, maibe kona-ba abandona sala laiha, tanba iha profesor neebe hanorin materia seluk, sira iha esperiensia bele hanorin ba disiplina rua neebe ohin mensiona, maibe sira tenke iha espriensia ba materia desportu no multimedia ninia, laos naran ba taka deit lae.
(jac)
