BAUKAU, STLTIMORLESTE.com – Instituisaun FALINTIL-Forsa Defeza Timor Leste (F-FDTL) selebra loron Komponente Aerea Lijeira (CAL – sigla português) ba dala IV, iha komponente Aerea Lanud Baukau.
Xefe Estadu Maior Jeneral F-FDTL, Tenente Jeneral Falur Rate Laek hateten, selebrasaun loron Komponente Aerea ba dala IV laos selebra deit, maibe atu halo reflesaun ba valores sira too iha momentu nee, liu-liu atu hasae konsiensia kona-ba importansia husi komponente estratejiku forsa armada nian.
“Kriasaun komponente Aerea nian marka momentu krusial ida iha ita nia forsa armada hodi reforsa ezistensia no atividade atu hatan ba dezafiu sira neebe ita hasoru, imi tenke sente orgulhu,” hateten Falur liu husi nia diskursu iha ambitu selebrasaun ezistensia komponente Aerea ba dala IV neebe realiza iha Ladun Baukau, Segunda nee (23/06/2025).
Tenente Jeneral nee sublina, membru sira tenke orgulhu, tanba involvimentu dahuluk iha ezistensia Komponente Aerea nian no sai hanesan fundasaun reel ba dezenvolvimentu, nunee husu atu hatudu abilidade no determinasaun hodi enkarma espiritu servisu neebe difini F-FDTL.
Nia fundamenta, selebrasaun nee nuudar dalan atu hateke ba futuru no hatan ba dezafiu sira neebe hasoru, husu autoridade politika sira hotu liu-liu Ministeriu Defeza tau atensaun no rekonhese ba papel krusial neebe Komponente Aerea Lijeira halao asegura seguransa no soberania nasaun Timor Leste.
Tanba atividade krusial neebe sei halo bainhira iha kapasidade operasaun buska no salvamentu nian, apoiu lojistiku vizilansia aero nian, tanba nee kontinua investe iha formasaun, teknolojia no kontinua parseria neebe permite hasae kapasidade Komponente Aerea Lijeira nian.
“Komponente Aerea Lijeira ho palestra ida, husi rai too lalehan konsolida vizasaun F-FDTL, atividade pedalojika ida nee fo importansia hodi diskute no aprende husi peritu sira aviasaun nian kona-ba pratika seguransa semo no kumprimenta navegasaun aerea nian mak ita promove nafatin ambiente aprendizajen no kontribui solusaun sira,” Falur akresenta.
Xefe Estadu Maior Jeneral F-FDTL, Tenente Jeneral Falur Rate Laek argumenta, hamutuk mak bele harii Komponente Aerea neebe bele hatan ba ezijensia sira, tanba nee husu estrutura CAL servisu nafatin ho pasu ba faze esensial sira neebe hanesan, avaliasaun no planeiamentu ba nesesidade sira, hasae kapasidade formasaun, tau matan infraestrutura aereo no koordenasaun entre forsas asegura operasaun konjunta iha rai laran.
Enkuantu, Ministru Defeza Kontra Almirante, Donaciano da Costa “Pedro Klmar Fuik” felezita aniversariu komponente aerea lijeira ba dala haat, nee konstitui ba forsa armada neebe progresu boot tebes no importante ba soberania Timor nian.
Almirante konta, bainhira aman nasaun sira deside transforma FALINTIL ba F-FDTL difisil tebes, tanba iha kilat tuan no rekursu umanus deit neebe objetivu atu bele prienxe ukun aan ho forsa neebe haree deit ba rai leten, tanba haluan komponente tasi no lalehan, maibe ho konsistensia dezenvolve tuir modelu pratika Internasional.
“Timor Leste forsa kiik transforma husi FALINTIL, maibe politika forsas armadas Timor Leste nian bele dezenvolve por modelu hanesan pratika Internasional ao longo 23 anos transformasaun ohin ita bele selebra Komponente Aerea ba dala IV,” hateten Almirante.
Entretantu Komponente Aerea Lijeira hahu nia ezistensia iha loron 23 fulan Junhu 2021, ho misaun no funsaun atu asegura soberania aereo nian iha Nasaun Timor Leste, neebe selebrasaun ba dala IV nee hetan mos partisipasaun husi Eis Prezidente RDTL Jeneral Taur Matan Ruak, Tenente Jeneral reformadu Lere Anan Timur, Prezidente Autoridade Munisipiu Baukau, Veneranda Lemos no entidades Sivil no militar sira seluk.
(tom)
