DILI, STLTIMORLESTE.com – Fornesedor programa merenda eskolar husi Ensinu Baziku Filial (EBF) Vila-Verde jere programa merenda eskolar tuir menu neebe mak iha.
Haktuir Xefe Fornesedor Merenda Eskolar iha EBF Vila Verde, Ludovina dos Santos ba jornalista STL iha nia knaar fatin Vila Verde, Tersa nee (24/06/2025).
“Dader ami mai eskola ami tein hahan ba estudantes nee uza ai sunu tanba gas laiha, depois dapur neebe mak ami uza tein merenda nee laiha, ida nee uza kalen taka deit mak ami tein iha laran. Estudantes sira kada loron asesu merenda eskolar, loron ida ami tein dala tolu, dader han tuku 10:00, meudia 12:00, loraik han tuku 15:00, ayam potong no ikan nee ami la uza, ami uza deit naan karau halo bifi, manu tolun, nunee mos han aifuan,” dehan nia.
Nia dehan, semana ida han loron lima, hahu husi loron Segunda too Sesta, estudantes sira han fore mungu ho susu been, dader mai sedu para tein ba estudantes neebe han dader iha tuku 10:00, tanba estudantes balun tama dader, meudia no balun tama loraik, estudantes dader nia han hotu, sira tenke prepara fali hahan ba meudia no loraik ninia.
Nunee mos Koordenadora EBF Vila Verde, Filomena Casmira dehan, ikan ho ayam potong la tama iha menu, tanba fornesedor sira sosa naan karau, fore mungu ho susu been, loron Sesta estudantes sira han aifuan.
“Ami simu orientasaun kontrolu merenda eskolar tuir menu neebe mak iha, eskola mos fo apoiu makaas ba programa ida nee, fornesedor sira prepara hahan ba ita nian oan sira, tanba fornesedor sira mak jere programa nee, ami husi eskola halo kontrolu, importante ita nian estudantes han, haree tuir menu nee diak ka lae no hahan too ka lae,” nia haktuir.
Nia dehan, estudantes sira han aifuan hudi, apel, sabraka, pateka, total estudantes iha eskola ida ne hamutuk 624 pesoas, profesores 18 no sala aprendizajen 6.
(jac)
