DILI, STLTIMORLESTE.com – Bainhira atu halo kolokasaun, bolsa kandidatu profesores tinan 2024 sei kontinua hatama sira nian dokumentus hanesan bom komportamentu ba Ministeriu Edukasaun (ME).
Liafuan nee hatoo husi Diretor Nasional Rekursu Umanu iha ME, João Amaral ba jornalista STL iha nia knaar fatin Vila Verde, Tersa nee (24/06/2025).
“Ita nian bolsa kandidatu neebe mak atu koloka nee agora sei kontinua kompleta dokumentus, tanba foin daudaun hatama nee balun ninia dokumentus bom komportamentu laiha, entaun agora ita fo tempu ba sira atu hatama ida nee no balun nian iha, maibe bom komportamentu nee mate ona no husu sira halo foun para mai hatama fali,” nia esplika.
Nia dehan, kolokasaun nee iha fulan Julhu nia laran nee, tanba kalendariu tentativa nee dia 8 Julhu, maibe sira sei haree husi kandidatu sira nian bom komportamentu ori mai kompleta ona, sira sei fo sai ba kandidatu sira para sira mai iha INFORDEPE dala ida aseita ou la aseita, total kandidatu neebe atu koloka ba nivel ensinu baziku nee hamutuk 187, nee husi valor 60 too 64.
“Sira iha bolsa laran nee 1.090, agora ita koloka tan 187, nee duni pur volta 9000 resin, kandidatu 187 nee ita sei koloka ba iha ensinu baziku, pre eskolar lae, tanba nee ita husu sira bele hatama sira nian bom komportamentu neebe mak mate ona, sira tenke ba halo foun para lori mai hatama,” nia hatutan.
Iha fatin seluk, Diretor Servisu Edukasaun Munisipiu Likisa, Julio da Silva hatete, bolsa kandidatu profesores neebe iha ona bolsa, nee kompetensia Ministeriu nian, tanba husi Edukasaun Munisipiu nee bainhira koloka ona mai mak foin simu sira, agora ba iha kolokasaun nee kompetensia husi ME nian.
“Hau hanoin kona-ba bolsa kandidatu profesores neebe iha ona bolsa nee kompetensia Ministeriu nian, tanba husi Edukasaun Munisipiu nee bainhira koloka ona mai mak foin simu sira, agora ba iha kolokasaun nee kompetensia husi ME nian,” nia afirma.
Nia dehan, sira nian eskola balun sei menus profesores, maibe ho rekrutamentu neebe ME halo bele responde ba eskola neebe sei menus profesores, ba oin presiza aumenta tan profesores.
(jac)
