DILI, STLTIMORLESTE.com – Durante semana ida nia laran Polisia Nasionál Timor Leste (PNTL) konsege rejistu kazu krimi hamutuk 81.
Hatete Portavos PNTL, Superintendente Polisia João Belo dos Reis ba jornalista sira liu husi konferensia imprensa neebe halao iha edifisiu Ministeiru Interior (MI), Kinta (03/07/2025).
“Ita relata mos durante semana ida nia laran PNTL halao servisu konsege rejista kazu Krimi hamutuk 81, hahu husi nivel suku too iha nasional kompostu husi kazu asaltu 21, violenesia domestika 36, ofensas integridade fizika 17, kontra bandu 7 no ameasa 6, maibe kazu sira nee maioria akontese iha Munisipiu Dili iha area juridiku Postu Administrativu Dom Aleixo, Vera Kruz no Nain Feto,” nia esplika.
Nia informa, durante semana iha Diresaun Tránzitu Seguransa Rodaviariu (DTSRN) ho seksaun sira neebe destaka iha Munisipiu sira nee konsege rejista kazu asidente trafégu hamutuk 54, rezulta kanek grave nain 8, kanek kmaan 58 no ema nain 3 lakon vida iha Timor Leste.
“Kazu asidente trafegu sira nee akontese ami identifika fator sira ne’ebe kontribui mak hanesan violasaun regra sinais tranzitu, konsumu tua bainhira kondus transporte, laiha esperiensia kondus transporte ho karta kondusaun laiha, kondus transporte halai ho velosidade makaas no natureza rai monu no dalan la diak ida nee mak kontribui ba kazu asidente trafegu iha Timor Leste,” deklara.
Iha fatin ketak, Sasin Alberico da Costa dehan, akontesimentu asidente nee tanba kareta Hilux ho volisidade neebe makaas husi Lospalos no kareta Triton soke malu tanba sira la kontrola.
“Ami nia primu Junito Mendes lakon vida tanba kareta nia tuir nee hanehan kedas nia ulun nomos ulun rahun, maibe iha mumentu neeba primu nee sei moris, maibe distansia neebe dook husi ospital no kareta ambulasia mos la too, primu hit liman too iis laiha,” nia informa.
Nia afirma, iha kareta Hilux nee nia laran ida mak matebian Junito Mendes ho kareta kanek kmaan, kareta ida seluk nee ema nain haat, maibe ida seluk nee mos la oras mate no nain tolu kanek todan, tanba nee ba maluk sira neebe lori kareta ho motor tenke ho kuidadu tanba mate sei la fila mai.
(jen)
