DILI, STLTIMORLESTE.com – Komando FALINTIL Forsa Defeza Timor Leste (F-FDTL) realiza semináriu loron rua kona-ba sensibilizasaun ba militar sira ho tema “Liu husi Konsiensia ba Asaun Promove Igualdade Jeneru Haforsa Etika no Responsabilidade”.
Xefe Estadu Maior FALINTIL-Forsa Defeza Timor Leste (F-FDTL), Brigadeiru Jenerál José da Costa Soares “TRIX” loke abertura sensibilizasaun ba militár sira ho tema “Liu Husi Konsiensia ba Asaun Promove Igualdade Jeneru Haforsa Etika no Responsabilidade” ba Militár sira kompostu husi Kuartel Jeneral, Komponente no Unidade sira.
“Se ita koalia kona-ba jeneru ka étika no responsabildade mak asaun konkretu ida neebe iha kareira vida militár feminina nian atu halo buat ruma, saida deit mak bele halo loron-loron, ida nee tau iha hanoin no tau iha responsabilidade,”.hatete Xefe Estadu Maiór F-FDTL, Brigadeiro Jenéral, José da Costa Soares “TRIX” ba jornalista sira liu husi nia diskursu iha Kuartel Jenerál F-FDTL Fatuhada, Dili, Tersa (08/07/2025).
Brigadeiro Jenéral, José da Costa Soares “TRIX” husu ba militar sira halo asaun ba buat hotu-hotu neebe iha nia responsabilidade, nee bazeia ba kareira étika neebe estabelese tiha ona iha instituisaun F-FDTL.
Iha fatin hanesan, Xefe Jeneru F-FDTL, Kapitaun Marquita da Cunha esplika, atividade sensibilizasaun ba militár sira nee ho tema “Liu Husi Konsiensia ba Asaun Promove Igualdade Jeneru Haforsa Etika no Responsabilidade”, atividade ida nee tama iha matriks anual seksaun Igualdade Jeneru nian ba iha tinan 2025.
“Objetivu atividade ida nee atu implementa planu asaun nasional neebe sei halao iha dia 13 too 25 , nomos intensaun komando nian liga ho situasaun real neebe ita nia militár sira sempre hasoru iha sira nia vida moris familia nian nomos iha servisu fatin,” nia afirma.
(jen)
