DILI, STLTIMORLESTE.com – Institutu Nasional Kombate HIV-SIDA (INCSIDA) sensibiliza informasaun kona-ba HIV-SIDA ba komunidade sira iha Suku Komoro, Postu Administrativu Dom Aleixo, Munisípiu Dili.
Nia dehan, objetivu prinsipál mai iha Suku Komoro atu fahe informasaun kona-ba moras HIV-SIDA nian ba komunidade enjerál iha Suku Komoro, tanba daudaun nee komunidade sira moris iha risku nia laran, tanba kazu HIV-SIDA aumenta ba beibeik.
“Ita mai hasae konhesimentu sira nian, no ita hatene katak durante nee sira moris iha risku nia laran, sira bele hakbesik aan ba fasilidade saude halo teste ba sira nia raan, para sira bele hatene sira nia estatus moras HIV-SIDA ou lae,” Diretora Nacional Promosaun Prevensaun no Komunikasaun iha Institutu Nasional Kombate HIV-SIDA (INCSIDA), Angelica Soares da Costa ba jornalista sira iha Sede Suku Komoro, Kuarta (09/07/2025).
Nia esplika, INCSIDA hakarak fahe infromasaun kona-ba moras HIV-SIDA nian beibeik, atu nunee sira bele komprende liu saida mak moras HIV-SIDA nee no oinsa atu halo prevensaun bá moras nee rasik.
“Suku ida nee laos foin permeira vez ami mai, mais informasaun neebe kleur ona sira bele haluha, tanba nee ita beibeik para sira komprende diak liu tan atu nunee sira bele komprende diak liu tan hodi halo prevensaun bá moras HIV-SIDA,” nia deklara.
Iha fatin hanesan, Xefe Suku Komoro, Eligio José Marçal informa, hanesan Autoridade Lokal informasaun konaba moras HIV-SIDA nee importante tebes ba komunidade sira, liu-liu ba joven sira, tanba moras HIV-SIDA nee hadaet liu husi relasaun seksual nomos liu husi inan ba oan.
“Ita rona ona dala barak, moras nee hadaet barak liu ona ba ita nia komunidade sira, depois ita nian populasaun Timor foin 1,3 agora ema neebe moras HIV-SIDA aumenta barak ba beibeik, entaun ita persiza halo sensibilizasaun ba komunidade sira,” nia koalia.
Nia afirma, wainhira ekipa INCSIDA nian mai halao kooperasaun diak hodi fahe infromasaun kona-ba HIV-SIDA nian, sente orgulhu tebes.
“Ami prontu nafatin, sira haruka nain 500 deit mak mai rona infromasaun nee, ami nia hakarak nee bele liu tan ida nee, tanba ita nia komunidade nee barak mak menus informasaun,” nia afirma.
(jen)
