DILI, STLTIMORLESTE.com – Iha loron 11 fulan Julhu tinan 2025 lokraik, Embaixador Japaun ba Timor Leste hamutuk ho Japan International Cooperation Agency (JICA) no Governu Timor Leste (TL) liu husi Diretor Jeral Instituisaun Nasional Administrasaun Públika (INAP), Policarpo Amilcar Boavida ho Instituto Nasional Formasaun Dosentes no Professional Edukasaun (INFORDEPE), halao serimonia despedida ba bolseiru Timoroan hamutuk ema nain 10 ba eskola iha area maestradu no doutoramentu iha Japaun.
Serimonia despedida nee halao iha Embaixada Japaun TL Pantai Kelapa Dili, Sesta lokraik (11/07/2025).
Embaixador Japaun ba Timor Leste, Tetsuya KIMURA hatoo benvindu kalorozu ba Prezidente Instituto Nasional Formasaun Dosentes no Professional Edukasaun (INFORDEPE) Domingos Martins ho estrutura nomos Bolseiru Timoroan sira iha serimonia despedida nee.
Japaun lao hamutuk ona ho TL hodi fornese asistensia ba harii kapital sosial nomos dezenvolve rekursu umanu dezde Sorumutu Doador dahuluk ba TL neebe halao iha Tokiu iha tinan 1999. Iha linha ho nia dedikasaun ba kapasitasaun ba povu TL, Governu Japaun oferese ona programa bolsu estudu lubuk ida.
Nia dehan, Timoroan liu nain 200 maka halao ona sira nia estudu iha Japaun, iha neebe nain 100 husi sira nee fila ona mai TL hanesan graduadu, ida-idak oras nee halao ona sira nia papel vital iha sira nia dezenvolvimentu nasaun.
Tinan ida nee, bolseiru nain 2 hahu sira nia estudu iha Japaun iha fulan Abril liu husi programa bolsa estudu MEXT. Liuhusi JICA nia inisiativa formasaun ba tempu naruk, formandu nain rua nee, sei hahu sira nia viajen akademika iha Japaun, hamutuk ho Bolseiru JDS nain 6 neebe sei estuda mos iha Japaun.
Bolsa Asistensia Japaun nian ba Dezenvolvimentu Rekursu Humanu, neebe konhesidu hanesan JDS, ho objetivu atu fo kbiit ba ofisial joven sira neebe promisor, neebe espera atu envolve iha implementasaun dezenvolvimentu sosial no ekonomiku, nuudar lider sira iha futuru. JDS oferese kursu sira Mestradu no Doutor nian iha eskola graduadu Japaun nian.
“Ami sente orgulhu atu nota katak, too ohin loron, Timor oan nain 44 mak envolve ona ho programa JDS ida nee, iha neebe sira nain 31 konsege hetan Mestradu ho susesu no kontribui ho ativu ba sira nia organizasaun afiliada sira no ba dezenvolvimentu TL nian em jeral,” dehan Embaixador Tetsuya KIMURA.
Nia dehan, JDS oferese laos deit oportunidade ba foin sae Timoroan sira atu hetan konhesimentu iha Japaun ba dezenvolvimentu nasional, maibe mos haburas lasu kooperasaun nian ho maluk sira husi nasaun seluk, neebe bele sai mos lider iha futuru.
“Hau hein katak, programa JDS sei hola parte hodi promove integrasaun Timor Leste ba ASEAN nuudar nia membru ofisial iha futuru,” nia realsa.
Maluk JDS Fellows, estajiarius tempu naruk JICA nian no bolseirus MEXT, nia hein ho laran tomak katak sira sei estuda makaas no halimar makaas iha Japaun no bainhira sira fila mai TL, atu mosu nuudar lider sira iha funsaun publika ka nuudar peritu sira, ekipadu ho perspetiva luan no esperiensia luan neebe hetan iha Japaun. Aleinde nee, nia hein atu haree sira kaer knaar prinsipal sira hodi liga ba nasaun rua, Japaun no TL ho hametin relasaun bilateral amigavel.
“Hau hatoo hau nia votus diak no susessu ba imi hotu nia estudu iha Japaun,” tenik Embaixador KIMURA.
Partisipa iha serimonia nee, Embaixador Japaun ba TL, Tetsuya KIMURA, Diretor Jeral Instituisaun Nasional Administrasaun Publika (INAP), Policarpo Amilcar Boavida, enkaregadu husi Reprezentante JICA iha TL, Daisuke Fukumori, Prezidente Komisaun Funsaun Publika (KFP), Agustinho Letencio de Deus no Bolseiru Timoroan ba Japaun.
(mik)
