DILI, STLTIMORLESTE.com – Forum Organizasaun Naun Governamental Timor Leste (FONGTIL) asina Memorandum of Understanding (MoU) ho International Peace Youth Group (IPYG) hodi servisu hamutuk ho FONGTIL ho nia membru sira, halo kooperasaun kona-ba edukasaun pas iha Timor Leste (TL).
Asina MoU nee husi Diretor Ezekutivu FONGTIL, Valentim da Costa Pinto ho Manajing Diretor Heavenly Culture Word Peace Restoration oh Light (HWPL), Joseph Hwang Global Branch neebe halao iha Salaun FONGTIL Kaikoli, Dili, Tersa nee (15/07/2025).
“Ohin ami ho IPYG asina MoU hanesan grupu joven ida ba paz ninian neebe mak hakarak servisu hamutuk ho FONGTIL ho ninia membru sira relasaun ho sira nia programa neebe mak sira halo tinan barak ona iha Timor kona-ba edukasaun ba paz ninian, hamutuk ho universidade sira iha Timor,” dehan Diretor Ezekutivu FONGTIL, Valentim da Costa Pinto.
Nia dehan, konkorda ona hodi asina ho IPYG atu sai hanesan grupu alvu ida neebe partisipa diak liu ho sira nia formasaun sira neebe halo iha Timor, relasaun ho edukasaun pas ninian jestaun ba disputa ho sasan sira neebe mak halo liu-liu entermus ho edukasaun ninia.
Nunee sira mos oferese kursu lian bazika Korea iha universidade sira entaun foti ho ami nia membru sira mos interese hodi bele proposta ba sira katak futuru klase ida nee mos hanoin bele estabele ho FONGTIL ho nia membru sira mos bele aprende lian korea.
“Ho formasaun sira neebe mak sira halo iha Timor liu-liu kona-ba edukasaun ba paz ninian, ami hatene sira mos fo formasaun ba jornalista sira iha tinan kotuk, hakarak ida nee mos FONGTIL ho nia membru sira ho nunee bele iha konhesimentu natoon ba jestaun kona-ba disputa sira no mediasaun,” afirma nia.
Nia tenik, harii paz nee laos tanba deit halo ba Timor maibe oinsa mak bele asegura kontribuisaun sira neebe mak FONGTIL ho nia membru sira kontribui ba promove paz no estabilidade iha rejiaun neebe mak ita hamutuk ba.
“Hanoin ida nee importante los nee mak ami konkorda atu bele servisu hamutuk ho grupu ida nee bele kontribui ba malu koopera liu-liu ba programa edukasaun sira neebe mak sira halao iha TL,” heteten nia.
Nia afirma, IPYG nia mensajen katak edukasaun ba paz nee sei ajuda ita hodi kontribui ba kria ambiente ida neebe mak seguru iha sosiedade no bele ajuda ema hotu bele promove pratika diak hadook tiha hahalok neebe mak bele afeta ba ema seluk nia direitu.
“Hahalok sira nee lao diak ita mos bele kontribui ba promove paz no hakmatek iha mundu, laos iha Timor deit mais iha mundu tomak, ida nee hanesan buat ida neebe mak atu hatete ba ema hotu katak paz no estabilidade mak sai hanesan instrumentu save ba dezenvolvimentu neebe mak lao diak, sem iha paz no hakmatek nee sei la akontese,” dehan nia.
Enkuantu durasaun ba asina MoU ida nee la termina ba nia tempu, hanoin katak edukasaun ida nee nia evoluasaun lao beibeik ho ninia dinamiku sira neebe mak barak entaun ida nee hanesan komitmentu ida neebe kesi hodi bele permiti aan ba servisu bainhira iha oportunidade sira neebe mak sira lori mai, posivel bele halo ami ho membru sira ida nee sai hanesan baze ida para kontinua servisu hamutuk ho sira iha futuru, neebe asina ida nee laiha terminasaun ba tempu.
Iha fatin hanesan, Manajing Diretor HWPL Global, Branch Joseph Hwang hateten, IPYG servisu hamutuk FONGTIL ho membru sira hodi atinji dame iha Timor Leste.
“Tan nee hau sei uza grupu nee, hau hein katak ami bele servisu hamutuk atinji dame, laos deit iha Timor Leste no ohin iha nivel global hamutuk, tanba nee obrigadu ba ita boot sira neebe halibur hamutuk no mai ita servisu hamutuk beibeik iha Timor Leste,” Jose Hwang hakotu.
(EST 1)
