DILI, STLTIMORLESTE.com – Iha tinan 2025 Forum Komunikasaun ba Feto Timor Leste (Fokupers) rejista kazu hamutuk 126 husi tipu violensia oin-oin.
Lia hirak nee hatoo husi Koordenadora Empoderamentu Sobrevivente Fokupers, Mercia de Jesus Lopes ba jornalista sira iha knaar nia knaar fatin Farol, Tersa (15/07/2025).
Nia esplika, durante nee fokupers rejistu kazu violensia hamutuk 126, husi kazu nee ho tipo oin oin.
“Total kazu neebe ami simu hamutuk 126 no 103 mak prosesu tuir legal hanesan iha polisia 60, Ministeriu Publiku 30, Defensor Publiku 1, tribunal 4 nomos trata dokumentus 8, husi kazu sira nee tinan 2025 iha 16 mak iha kazu final, pena prizaun 4, suspensaun 3, alimentasaun 2, kazu arkiva ida, absolve 4 no pena multa 2,” katak nia.
Koordenadora dehan, iha tinan ida nee Fokupers reintegra ona kliente 74 nomos ho oan sira 42, no kliente neebe mak asesu ba eskola iha tinan ida nee nain 9.
Nunee mos Ofisial Legal Fokupers Vilfrida M. Fernandes hatete, durante nee Fokupers servisu hamutuk ho parseru sira no kazu krimi sira Fokupers labele rezolve, nee remata iha tribunal, prosesu legal tenke ba oin.
“Kazu sira nee remata ami sempre servisu hamutuk ho parseiru sira hanesan ALFELA, JSMP, entaun bainhira arguidu hetan ona pena entaun vitima ka kliente sira hakarak ona fila ba sira nia hela fatin ami sei halo reassessment no ami re-entrega fila fali ba kliente sira,” katak nia.
Nunee mos ba sira neebe kazu violensia domestika, entaun Fokupers iha programa ida hodi fo fundus oituan atu nunee sira bele kontinua fali sira nia moris liu husi fo osan oituan ba sira nunee sira halo bisnis ruma, ida nee mak Fokupers nia intervensaun bainhira kazu remata.
Nunee mos Rio Aroujo ofisial Advokasia Fokupers hatete, Estadu Timor Leste tenke haree injustisa no lia los neebe sei konsidera hanesan dezafiu iha implementasaun ba lei sira neebe asegura sidadaun hotu liu-liu feto sira hodi moris livre no independente.
“Tinan 2025, husi Janeiru too Julhu, too oras nee kazu neebe Fokupers atende no rejista hamutuk kazu 126 husi tipu kazu violensia fizika, Violensia Seksual, Abuzu Seksual, asediu seksual, insestu no kazu sira seluk, violensia bazeia ba jeneru hasoru feto no labarik-feto neebe akontese iha relasaun familia ka domestika no mos iha publiku,” katak nia.
Nia hatete, konsidera katak violensia hasoru feto no labarik feto sei kotinua buras, bainhira Estadu Timor Leste la garante ho diak implementasaun lei sira no la halo monitorizasaun ka fiskalizasaun ho masima atensaun ba kompanhia ka ajensia sira neebe mai buka lukru iha Timor Leste hodi hanehan nafatin povu liu-liu feto sira neebe laiha kbiit.
(eme)
