DILI, STLTIMORLESTE.com – Governu liu husi Sekretariu Estadu ba Igualdade (SEI) hamutuk ho parseiru hotu presiza servisu makaas hodi bele hapara violensia domestika iha rai laran.
Feto Potensial Maria Amaral ba STL iha nia knaar fatin Kaikoli Kinta nee (17/07/2025) hatete, atu hapara violensia iha sosiedade parte hotu presiza servisu makaas hodi halo sosializasaun, nunee sosiedade bele komprende.
“Luta atu hapara parte hotu-hotu presiza servisu makaas liu-liu Governu liu husi SEI hamutuk ho linha Ministerial hotu presiza halo sosializasaun hahu husi nasional too area remotas, nunee komunidade bele komprende saida mak lei violensia domestika,” katak nia.
Nia hatete, sosializasaun labele iha nasional deit, presiza ba too iha munisipiu, tanba komunidade balun neebe mak iha area remotas ladun asesu informasaun husi media tanba ahi eletridade laiha no balun la asesu informasaun husi ministeriu relevante sira, tanba nee presiza halo sosializasaun husi nasional too munisipiu.
Nunee mos Diretora Fokupers, Domingas Domingas Afonso Amaral hatete, Fokupers hola parte hanesan komisaun interministerial ida neebe mak ba iha implementasaun planu asaun nasional violensia bazeia ba jeneru, fokupers kordena pilar ida segundu ba iha produsaun servisu nia.
“Entaun esforsu sira neebe durante nee ita halo ita laos mesak, ita engaja husi Governu nomos husi parte sosiedade sivil hotu, ita kontinua halo prevensaun liu husi meius oin-oin liu husi advokasia sira neebe ita halo, aleinde halo advokasia ita kontinua habelar sensibilizasaun sira ba too iha komunidade, esforsu balun mak daudaun nee komesa ona integramentu ida kona-ba oinsa atu foku liu ba iha inan aman sira ba familia sira hahu kedas husi familia hodi promove feto ho mane sira neebe mak hahu forma familia oinsa sira fahe knaar hanesan iha familia oinsa balansu ba iha kbiit no poder iha uma laran atu bele respeita malu,” katak nia.
Diretora dehan, laos deit halo servisu atu fornese asistensia bainhira kuandu mai ona maibe kontinua halo nafatin prevensaun liu husi sensibilizasaun sira iha baze oinsa muda ema nia mentalidade no ema bele hamutuk prevene violensia feto no hasoru labarik feto.
Nunee mos Rio Aroujo ofisial Advokasia Fokupers hatete, Fokupers iha divizaun advokasia, iha advokasia nia laran iha atividade neebe halo oinsa mak bele prevene violensia labele akontese mak liu husi meius oin-oin.
Mekanizmu balun mak liu husi sosializasaun ka treinamentu hodi fahe informasaun ba estudante, lider komunitariu ba komunidade enjeral liu-liu ba inan aman sira oinsa mak sira hatene no komprende kona-ba siklu violensia neebe akontese iha nasaun liu-liu norma legal sira husi nasional no internasional neebe vigor ona iha nasaun atu sira bele komprensaun.
“Iha parte seluk mos meius ida halo prevensaun mak ita sosializa ba estudante, autoridade lokal no inan aman liu-liu prosesu rede referal nia oinsa mak kazu ruma akontese iha sira nia aan ka sira nia familia no sosiedade oinsa mak sira refere kazu katak sira sai violadu husi ema seluk,” katak nia.
Nia hatete, Fokupers mos hola parte iha konvensaun sira hanesan konvensaun 1325 koalia kona-ba feto pas no seguransa neebe daudaun nee lidera husi Ministeriu Interior, no Fokupers mos hola parte iha laran iha parte prevensaun no prevensaun nia oinsa mak atu sosializa informasaun liu-liu iha norma sira neebe mak Estadu Timor Leste ratifika ona atu prevene labarik feto no feto moris livre husi siklu neebe akontese iha nasaun TL.
Nunee mos Sekretaria Estadu ba Igualdade, Elvina Sousa Carvalho hatete, Governu liu husi SEI nafatin halo esforsu makaas laos, servisu mesak maibe servisu interministerial nunee bele halo servisu makaas oinsa mak bele hapara kazu Violensia domestika ou violensia oin-oin hasoru feto no labarik feto iha Timor Leste.
(eme)
