DILI, STLTIMORLESTE.com – Ministeriu Komersiu no Industria (MCI – sigla português), Nino Pereira ofisialmente halo abertura ba feira kultural ba Comunidade dos Países de Lingua Portuguesa (CPLP).
Iha diskursu Ministeriu Komersiu no Industria (MCI), Nino Pereira dehan, lori MCI nia naran, iha parseria besik ho Ministeriu Juventude, Desportu, Arte, no Kultura (MJDAC) feira Kultural CPLP nee halao hanesan parte ida husi Jogu Desportu CPLP ba dala XII ho nia tema “Sabores Sons e Cores da CPLP num so Lugar”.
“Eventu nee reprezenta oportunidade espesial ida atu selebra buat neebe ita valoriza diversidade husi ita nia kultura sira, forsa husi lian português no espiritu kooperasaun entre ita nia rain sira. Ida nee mos momentu ideal atu valoriza identidade Timoroan nian, promove buat neebe diak liu neebe ita produz lokalmente no apoia turizmu kultural, komunitariu no gastronomiku nuudar motores ba dezenvolvimentu ekonomiku neebe sustentavel,” dehan MCI, Nino ba jornalista sira iha CCD (20/07/2025).
Nia dehan, feira kultural mak esperansa lo-loos ba talentu no kriatividade husi ami nia mikro-emprezariu artezanatu artista sira no kozineira sira.
“Aprezentasaun idak-idak nia talentu no kriatividade, partisipante idak-idak konta istoria sira kona-ba tradisaun, inovasaun no paixaun ba saida mak ami halo, ami halibur maun-alin CPLP sira mai hamutuk, ami fahe kona-ba ami nia kultura, ami fahe esperiensia sira no loke odamatan ba interkambiu ekonomiku ho lansa fonte sira ba kolaborasaun komersial iha futuru.
Nunee Ministeriu MCI esforsu nafatin atu kria kondisaun favoravel ba kreximentu setor produsaun nasional liu husi promove parseria no oportunidade ba Timoroan hotu-hotu.
(EST 1)
