DILI, STLTIMORLESTE.com – Komandante Polisia Nasional Timor Leste (PNTL) Munisípiu Dili, Superientendente Xefe Polísia, Orlando Gomes hatete, durante Jogu Desportiva Comunidade dos Países de Língua Portuguesa (CPLP) nee PNTL la rejista kazu asidente no situasaun lao diak.
“Durante atividade jogu Desportiva CPLP foin daudaun realiza abertura no kontinua jogu tuir mai too agora situasaun jeral durante jogu nee lao diak, laiha insindente ou asidente ruma durante jogu nee lao,” hatete Komandante PNTL Munisípiu Dili, Superientendente Xefe Polísia, Orlando Gomes ba jornalista sira iha Aitarak Laran, Tersa (22/07/2025).
Nia dehan, autoridade seguransa la rejista kazu krimi ka asidente durante jogu nee, tanba komunidade ka adeptus sira kontibui ba pas no organizadu hodi kumpri ordem neebe mak seguransa estabelese ona.
Nia mos konsidera, komunidade sira mos apoiu no kontribui tebes ba seguransa ninian. Nunee jogu nee hahu abertura jogu entre Timor Leste kontra Portugal too remata situasaun lao diak.
“Durante jogu CPLP nee lao husi abertura too agora laiha asidente ka insendente ruma. Ita la rejista kazu neebe akontese, atividade kontinua lao normal,” nia esplika.
Nia esplika, komando mos sei kontinua orienta membru sira hodi apoiu nafatin seguransa durante jogu nee hahu too remata.
“Iha abertura jogu nee laiha kareta no motor ruma mak lakon, tanba seidauk iha keixa ruma mak tama mai,” nia informa.
Iha fatin ketak, Akademista UNTL, Adérito da Silva koalia, Jogu Desportivas CPLP nian nee foin primeira vez akontes, tanba nee husu ba PNTL tenke fo seguransa masimu ba jogu Desportu CPLP nee.
“PNTL servisu makaas duni, tanba durante nee laiha problema no situasan lao hakmatek, tanba jogu CPLP halo Timor nia naran morin iha mundu, ho ida nee ita tenke halo diak liu tan ba ema hotu nia matan,” nia afirma.
(jen)
