DILI, STLTIMORLESTE.com – Prezidente Republika (PR), Jose Ramos Horta hatete, nia planu kleur ona hakarak ba vizita monumentu saudozu Nikolao Lobato nia fatin neebe hakotu iis ikus iha Manufahi.
Prezidente Republika Jose Ramos Horta hatoo kestaun nee ba jornalista sira, bainhira remata akompanha jogu Voli Praia iha Lecidere, Tersa (22/07/2025).
“Hau hakarak duni vizita iha dia 16 ka 17 orsida ka aban hau sei simu brifing husi Jeneral Lere, Falur, ba preparativu ba too iha neeba, hakruk ba memoria ba saudozu iha fatin neebe nia iis kotu, hau nia ideia kleur tiha ona, agora zatamente oinsa atu ba, la hatene ba ho kareta obras publika hadia dalan oituan bele too iha neeba,” dehan PR Horta.
Prezidente Republika hatete, Obras Publika presiza hadia estrada too iha saudozu nia fatin neebe hakotu iis ba, nunee Prezidente bele vizita maibe labele gasta osan boot hadia Estrada agora kedas maibe tempu mai bele hadia Estrada too iha saudozu nia fatin neebe nia hakotu iis ba halo fatin sai memorial ida.
“Depois tempu seluk bele hadia Estrada diak bele halo fatin nee hanesan memoria ida, tinan-tinan ita bele ba,” katak PR Horta.
Xefe Estadu hatete, lalika halo ona monumentu tanba monumentu barak ona iha Timor liu-liu monumentus Nikolao Lobato, maibe bele halo jardin ida ho uma tanba uma mos hanesan jardin ida.
“Jardin Metinaro nee bolu jardin erois nee doutor Mari Alkatiri nia Primeiru Ministru mak fo naran nee brilhante jardin dos herois, nee hau hatoo parabens ba Doutor Mari alkatiri, iha neeba ita bele halo jardin Nikolao Lobato diak kapaas ho uma no fatin kemping,” katak Horta.
Maibe atu halo jardin iha fatin neebe saudozu hakotu iis ba maibe sei halo koordenasaun ho Governu karik Governu konkorda bele halo, se orsamentu laiha bele buka orsamentu oituan bele hahu halo.
Tuir imformasaun neebe STL hetan, Prezidensia Republika halo observasaun ba Proklamador Francisco Xavier Nia Uma Iha Turiscai.
Ekipa ida husi Prezidensia Republika hamutuk ho Ekipa Teknika Konjunta neebe inklui reprezentante sira husi Ministeriu Defeza, neebe lidera husi Major Victor Marçal “SUPERMAN,” no Ministeriu Obras Publikas (MOP), halo ona levantamentu ba uma matebian primeiru Prezidente RDTL, Francisco Xavier do Amaral, iha Turisca hanesan preparasaun ba vizita Prezidente Ramos Horta.
(eme)
