DILI, STLTIMORLESTE.com – Prezidente Republika (PR), Jose Ramos Horta sujere Governu kria lei, nunee kondena ema neebe mak soe lixu arbiru.
Prezidente Republika Jose Ramos Horta hatoo kestaun nee liu husi nia diskursu bainhira partisipa partisipa Loron Nasional ba dala X ho tema “Lori Saude Hakbesik ba Komunidade no Haforsa Prevensaun”, iha Ponte Habibie, Sesta nee (25/07/2025).
Prezidente Republika hatete, Governu presiza iha politika ruma kria lei nunee bele kondena ema neebe soe lixu arbiru.
“Favor ama sira, mane sira iha nee alin sira loron loron imi haree servisu saneamentu foti lixu iha Dili hamoos Dili laran maibe imi balun ho imi nia kareta prado, iha kareta laran ho familia ho feen namorada ho labarik sira dala ruma hatun vidru soe plastiku husi janela kareta nian, depois pior liu mak trak sira loza bobot halo lixu iha Hera, Metinaro too Tibar fakar lixu arbiru, imi mak responsabilidade mak moras kontinua iha Timor,” dehan Prezidente Republika.
Prezidente Republika hatete, ema neebe mak laiha responsabilidade soe lixu arbiru iha fatin fatin nee mak kontribui atu aumenta numeru moras iha rai laran.
Xefe Estadu hatete, estadu lakon osan ba saneamentu hodi hamoos sidade maibe ema balun laiha konsiensia hodi kontinua soe lixu arbiru.
PR dehan, ema seluk mak haluha servisu saneamentu maibe Prezidente nunka halo sidadaun sira neebe mak servisu iha saneamentu, tanba nee fo mos kondekorasaun ba sira neebe foti lixu, liu-liu sira neebe mak motorizada no raut lixu iha hospital no fatin seluk.
“Sira mak foti ita nia lixu ita fakar iha fatin hotu-hotu la aprende kakutak laiha sentidu responsanlidade, para kareta soe lixu, hau haree ho hau nia matan, buatomak balun no buatinak balun iha kareta laran soe lixu ita baruk ona haree ida nee, Governu devia halo politika ruma para ho kamara nunee se mak soe lixu multa makaas ba ema sira nee, tau kamera iha sidade tomak,” katak PR Horta.
Iha biban nee Prezidente Republika husu ajuda ba Embaixada Xina hodi apoiu kamera CCTV iha fatin publiku sira, nunee bainhira ema neebe mak soe lixu arbiru bele multa ho karun.
“Hau husu ba Embaixada Xina favor tau kamera ba ami iha sidadae tomak para hafuhu ema hotu-hotu se mak soe lixu kaer kedas,” Katak PR.
Iha biban nee Prezidente Republika husu ema hotu presiza soe lixu iha nia fatin nunee bele prevene moras iha rai laran.
(eme)
