DILI, STLTIMORLESTE.com – Prezidente Republika (PR), Jose Ramos Horta hamutuk ho Embaixador Tailandia no povu Tailandia neebe mak hela iha Timor Leste selebra Liurai Tailandia nia aniversariu ba dala 73, iha Palasiu Prezidensial.
Serimonia selebra Liurai Tailandia nia aniversariu ba dala 73 halao iha Palasiu Prezidensial. Iha biban nee embaixada Tailandia apoiu prendas ba labarik sira iha kantina matak.
Prezidente Republika Jose Ramos Horta ba jornalista sira iha Palasiu Prezidensial Nikolao Lobato, Bairo Pite, Sesta nee (25/07/2025) hatete, ohin hamutuk hodi selebra liurai boot Tailandia nia aniversariu ba dala 73.
“Ohin liurai boot Tailandia nia tinan, tinan liu tiha ona maibe ohin mak embaixada halo selebrasaun halo iha palasiu iha kantina matak, embaixada ho komunidade Tailandia oferese almosu no prendas ba labarik sira atus hira kedas iha nee, Embaixada Tailandia hanesan mos embaixada sira seluk, Embaixada Indonezia dala ruma mai iha halo mos atividade, hodi apoiu atividade prezidensia iha kantina matak, nia atividade fahe foos lubuk ida, foos nee depois Prezidensia lori ba orfonatu neebe simu oan kiak sira iha neeba, programa diak tebes ho partisipasaun embaixador nia seniora nomos senhor senhora sira komunidade Tailandia iha nee,” dehan PR Horta.
Iha biban nee Embaixador Tailandia ba Timor Leste, Atipat Rojanapaibulya hatutan, ohin embaixador hamutuk ho komunidade Tailandia iha Timor Leste halao atividade voluntariu iha kantina matak Prezidensia Republika hodi selebra Liurai Boot Tailandia nia aniversariu.
“Nee laos primeira vez halao iha kantina matak maibe iha programa barak neebe halao ona liu-liu selebra liurai nia tinan no ami halo ona dala rua iha Palasiu Prezidensial no fahe mos sasan balun hodi haree liu ba nutrisaun nia atu fo han labarik sira ho kualidade,” katak Embaixador.
Embaixador sente kontente tanba Prezidente Republika sai hanesan bainaka neebe mak importante iha selebrasaun liurai boot Tailandia nia aniversariu iha Palasiu Prezidensial.
Nia hatete, selebrasaun liurai boot nia aniversariu oferese hahan ba labarik sira iha kantina matak no apoiu mos nesesidade baziku oinsa mak apoiu hahan neebe nutritivu ba labarik sira.
(eme)
