BAUKAU, STLTIMORLESTE.com – Relasiona informasaun neebe espalha iha medida sosial kona-ba Bispu Diozese Baukau, Dom Leandro Maria Alves iha linha koordenasaun segredu ho Igreja Katolika Karismatika Timor Leste (ICCTL – sigla português) atu kandidata aan sai Bispu foun ba ICCTL nee la loos no konsidera prezensa ICCTL ilegal, tanba nee husu Autoridade Seguransa Polisia Sientifika Investigasaun Kriminal (PSIK) halo kapturasaun ba dirijenti ICCTL.
Informasaun kona-ba kandidatu Dom Leandro Maria Alves atual Bispu Diozese Baukau atu asumi kargu Bispu ICCTL iha futuru mai, publika husi identidade Facebook VaiRock ICCTL iha loron hirak liu ba.
Nunee liu husi konfirmasaun jornalista sira ho Dom Leandro Maria Alves atual Bispu Diozese Baukau iha loron 28 Julhu nee hateten, prezensa ICCTL kria ona konfuzaun antes matebian Papa Francisco mai iha Timor Leste no antes nee mos Governu liu husi Ministeriu Justisa fo sai ona katak, ICCTL nuudar grupu ilegal iha Timor Leste neebe gosta halo propaganda.
“Ita husu ba autoridade kompetente sira haree hahalok sira hanesan nee, PSIK buka tuir atu konfirma sira nia verasidade, ida nee buat ida kee la loos perturba ita nia moris hamutuk ho komunidade kria konfuzaun iha sarani sira nia leet,” hateten Dom Leandro iha Vila Antiga Buakau, Segunda (28/07/2025).
Bispu Diozese Baukau nee konsidera, publikasaun ICCTL kona-ba Dom Leandro Maria Alves atu asumi kargu Bispu ICCTL iha futuru mai, nee la loos no perturba igreja Katolika nia moris hamutuk ho sarani sira.
Tanba nee husu dirijente ICCTL sira atu responsabilidade ba publikasaun imajem Bispu Diozese Baukau.
“Mai hau propriu simu mensajen husi maluk no sarani sira neebe hatudu preokupasaun ba ida nee, nee mak hau dehan nee, nee grupu ida neebe mak ita nia nain ulun polisia sira buka tau atensaun ba ida nee,” Katak Dom Leandro.
Bispu Diozese Baukau konsidera, ICCTL grupu ilegal no prezisa Autoridade relevante sira tau atensaun, tanba falta respeitu ba ema nia figura hodi publika, neebe bele hamosu polemika kontradisaun no kria insultu la edukativu iha sosiedade nia leet.
Mezmu publikasaun husi identidade Facebook VaiRock ICCTL iha loron hirak liu ba, parte Autoridade Igreja Katolika iha Timor Leste seidauk aprezenta keixa ba parte relevante sira, maibe ba akontesimentu seluk sira neebe kria husi grupu ICCTL, parte Autoridade Igreja Katolika iha Timor Leste hatoo ona keixa no konsege halo kapturasaun ba autor balun.
Nunee Autoridade Seguransa sira bele bazeia ba keixa uluk sira hodi buka tuir autor ba publikasaun imajen refere.
(tom)
