DILI, STLTIMORLESTE.com – Prezidente Republika (PR), Jose Ramos Horta hatete, dormitoriu neebe mak sei halo iha Palasiu Prezidensia Republika nia sorin sei kaer husi Madre Salesiana sira.
Tuir observasaun neebe mak STL hetan bainhira Prezidente Republika Jose Ramos Horta hatoo ba jornalista katak Dormitoriu neebe mak harii iha palasiu iha Prezidensia Republika nia sorin neebe kontrui husi Emiratus Unidus Arabe iha tempu badak, bainhira finaliza madre husi kongregasaun Salesiana mak sei tau matan.
Aleinde nee iha loron Domingu (27/07/2025) hatete, Prezidente Republika, Jose Ramos Horta akompanha husi Xefe Kaza Sivil, Jesuína Maria Ferreira Gomes halao enkontru ho Reverendada Irman Ena Veralís Bolanos, Economa Jeral Institutu Filhas de Maria Auxiliadora (FMA) husi Roma, Italia, iha Rezidensia Saleziana iha Komoro.
Institutu Filhas de Maria Auxiliadora, konesidu mos nuudar Irman Saleziana, mak kongregasaun relijioza katolika neebe harii husi Saun João Bosco no Santa Maria Domenica Mazzarello, ho prezensa global iha edukasaun no servisu sosial.
Prezidente Republika Jose Ramos Horta ba jornalista hatete, daudaun nee Prezidensia Republika hamutuk ho Ministeriu Justisa halo ona akordu ho Komunidade neebe mak okupa rai prezidensia Republika no tempu badak komesa halo ona konstrusaun.
Prezidente Republika hatete, rai neebe komunidade okupa pertense ba Prezidensia Republika nia, rai nee sei utiliza hodi halo dormitoriu ba foinsae feto sira hodi hela, antes nee Prezidente Republika koalia ona ho Madre Guilermina atu halo dormitoriu iha balide Madre Timoroan hatan maibe madre superiora sira husi Roma mak resposta tarde tanba nee Prezidente Republika ho inisiativa deside halo iha Palasiu Prezidensia nia kotuk.
Prosesu halo Dormitoriu nee atu hahu ona iha tinan ida nee nia laran obras hahu too 2026 bele pronto ona bele hatama labarik oan feto sira neebe idade universidade bele bele too atus tolu too atus lima.
PR hatete, koalia ona ordem salesiana madre salesiana mak toma konta, la presiza barak tanba feto hotu hotu maioria boot ona laos kosok oan neebe ema tenke ba haree depois organiza didiak feto foinsae neebe hela iha Dormitoriu nee sira mak sei organiza malu halo orariu rotasaun ba tein, hamos uma no seluk tan maibe iha madre balun para orienta sira.
(eme)
