DILI, STLTIMORLESTE.com – Embaixadora Timor Leste ba Reinu Beljika, Maria de Lurdes Martins de Sousa Bessa durante mandatu buka hametin kooperasaun bilateral ho Reinu Beljika.
Embaixadora Timor Leste ba Reinu Beljika, Maria de Lurdes Martins de Sousa Bessa hatoo kestaun nee ba jornalista sira bainhira remata simu pose husi Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Tersa (29/07/2025).
Bainhira remata simu pose, Embaixadora hatete, durante nia mandatu sei buka kontinua embaixador sesante sira nia servisu neebe halo ona no buka hametin kooperasaun bilateral entre Timor Leste ho Reinu Beljika.
“Ita nia embaixada iha Bruselas nomos Uniaun Europeia estabelese kleur ona, buat neebe hau atu halo kontinuidade ba kooperasaun ba relasaun bilaterais neebe iha, neebe hahu kleur ona iha neeba iha bilateral no reinu belgica nomos multilateral sei akompanha dezenvolvimentu hotu neebe akontese iha uniaun Europeia,” dehan Embaixadora.
Embaixadora dehan, fundamental liu mak kontinua saida mak Timor Leste hahu tiha ona no explora dalan ba extende tan koperasaun tuir prioridade neebe Governu nia hanesan atrai investimentu internasional haree ba area dezenvolvimentu rural no dezenvolvimentu nasional no seluk tan.
Sei buka halao servisu hotu neebe sai mos prioridade Governu nia embaixadora sei buka dalan atu bele kontinua atividade neebe embaixador antes nee halo ona buka kontinua hametin liu tan buat neebe bele lori benefisiu mos ba pais relasaun ba Timor Leste ho Uniaun Europeia.
“Hanesan ita boot sira hatene ita iha misaun boot ida ho Uniaun Europeia iha Timor Leste no kooperasaun lubuk ida ita halao tiha ona neebe akompanha nafatin nomos akompanha situasaun rasik iha uniaun Europeia tuir situasaun internasional neebe agora dadaun iha ho konflitu lubuk ida ho dezentendimentu lubuk ida atu mantein mos ita nia Governu bein imformado konaba situasaun ida nee,” katak nia.
Iha biban nee Embaixadora mos hatoo agradese ba Prezidente Republika nomos Governu neebe mak fo komfiansa ba nia assume kargu nuudar embaixadora TL ba Laos.
Nunee mos Prezidente Republika Jose Ramos Horta iha konfiansa tomak ba Embaixadora Bessa sei hametin liu tan relasaun Timor Leste ho Beljika.
“Hau iha konfiansa katak Embaixadora Bessa no Embaixador Câmara sei serbi ho exelensia, hodi hametin liutan ita-nia relasaun sira ho Beljika no Laos, no tane aas valor sira ita-nia nasaun nian,” afirma Prezidente, Ramos Horta.
Embaixadora Bessa sai diplomata distintu ida, ho esperiensia barak iha area polítika, diplomatika no edukasaun. Antes nee, nia okupa kargu hanesan Vise-Ministra Edukasaun no Kultura (2017–2018), Membru Parlamentu Nasional (2012–2017), no Embaixador ba Suisa (2021–2024). Nia mos servisu nuudar Asistente Polítiku ba UNTAET, Asistente Pessoal ba eis-Prezidente Xanana Gusmão, no Asistente Polítika iha Embaixada EUA iha Timor Leste.
Ho nia kontribuisaun, Prezidente Ramos Horta kondekora ba nia Grau Kolar Orden Timor Leste (2024). Defensora ida ba direitu feto no juventude, nia autor ba livru Loron Ida no servisu ho organizasaun hanesan Fundasaun Alola hodi promove kauza sosial sira.
(eme)
