DÍLI, STLTIMORLESTE.com — Ministru Juventude, Desportu, Arte no Kultura, Nélio Isac Sarmento, hamutuk ho Prezidente Federasaun Silat Timor-Leste, Hermenegildo Custódio da Silva, no Prezidente CRAM, Octávio da Conceição, halo sosializasaun Lei Nú. 9/2026, 22 Julhu, kona-ba rejime jurídiku ba hanorin, aprendizajen no prátika arte marsiais iha Timor-Leste.
Sosializasaun ne’e hala’o iha salaun MJDAC, Sional, Dili, iha Sesta-feira, 15 Outubru 2026, ho partisipasaun lideransa grupu arte marsiais husi Kera Sakti, Perisai Diri, Padjajaran, PSHT no KORK.
Lei ne’e integra medida sira atu promove polítika nasionál ba prevensaun no kombate violénsia ne’ebé relasiona ho hanorin, aprendizajen no prátika arte marsiais iha Timor-Leste.
Ministru Nélio Isac Sarmento esplika katak, lei foun ne’e ezije grupu arte marsiais sira ne’ebé rejistadu ona atu atualiza fila-fali sira-nia rejistu no estrutura organizasionál.
“Lei Nú. 9/2026 haruka grupu arte marsiais hotu atu rejista fila-fali, tanba rejistu tuan ne’e presiza atualizasaun. Organizasaun sira, liuliu grupu sira ne’ebé tama iha ramu silat, tenke atualiza sira-nia estrutura organizasionál,” Nélio Isac Sarmento hateten ba jornalista sira.
Nia hatutan katak, organizasaun silat sira, hanesan PSHT, IKS PTL, KORK, Padjajaran, Seruling Dewata no Perisai Diri, tenke atualiza sira-nia estrutura ba orgaun kompetente, atu fasilita koordenasaun ho autoridade relevante no Federasaun Silat Timor-Leste.
Ministru ne’e mós afirma katak koordenasaun entre instituisaun sira importante atu prepara regulamentu ne’ebé orienta prátika arte marsiais, inklui organizasaun kompetisaun.
Aleinde ne’e, Nélio Isac Sarmento husu grupu arte marsiais sira atu servisu hamutuk ho Governu hodi buka apoiu tékniku husi Indonézia, liuliu iha área treinadór, arbitragem no formasaun téknika.
“Se grupu arte marsiais sira seidauk iha rekursu umanu, hanesan treinadór no árbitru, ita presiza halo kooperasaun ho Indonézia. Ita orienta Federasaun Silat Timor-Leste atu ko’alia ho Ikatan Pencak Silat Seluruh Indonesia hodi buka apoiu tékniku,” nia deklara.
Nia esplika katak, liuhusi kooperasaun ne’e, ema Timor-Leste bele partisipa iha kursu treinadór, arbitragem no formasaun téknika seluk atu hasa’e kapasidade no atualiza koñesimentu iha organizasaun arte marsiais sira.
Ministru ne’e hateten katak, formasaun bele hala’o iha Timor-Leste ho apoiu husi Indonézia, ka haruka reprezentante sira ba tuir formasaun diretamente iha Indonézia.
Governu espera katak, sosializasaun lei ne’e bele ajuda organizasaun arte marsiais sira atu kumpre regra legál, hadi’a estrutura organizasionál no promove prátika arte marsiais ne’ebé seguru, ordenadu no livre husi violénsia.
(leo)
