DILI, STLTIMORLESTE.com – Embaixador Timor Leste (TL) ba Laos, João Freitas de Câmara durante nia mandatu sei tau prioridade ba kooperasaun espesifiku ba area ekonomika.
Embaixador Estraordinariu no Plenipotensiariu Timor Leste ba Republika Demokratika Popular Laos, João Freitas de Câmara hatoo kestaun nee ba jornalista sira bainhira remata simu pose husi Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Tersa (29/07/2025).
Iha loron Tersa, João Freitas de Câmara simu pose nuudar Embaixador Estraordinariu no Plenipotensiariu ba Republika Demokratika Popular Laos, remata posse Embaixador hatete durante nia mandatu sei kontinua atividade neebe embaixador uluk halo ona no nia sei hametin koperasaun espesifiku iha area ekonomika.
“Embaixador prioridade neebe ke hau iha tanba hau ba nee troka embaixador iha neeba, servisu tiha ona hau sei ba fo kontinuidade ba programa neebe lao ona iha neeba, liu-liu iha area kooperasaun ekonomika ita asina ona kuadru de kooperasaun ekonomika ho akordu lubuk ida ke ita asina ona, karik seidauk iha implementasaun parte ita nia hau sei fo kontinuidade para tama iha implementasaun, nunee parte rua nee bele halao akordu sira neebe asina ona nee sai prioridade numeru um,” katak Embaixador João.
Nia hatete, iha nia mandatu buka fo oinsa halo kooperasaun entre Timor Leste ho Laos, maibe espesifiku ho Programa ekonomia.
Nunee mos Ministru Negosiu Estranjeiru no Kooperasaun, Bendito Freitas mos ho esperansa ho mandatu embaixador sira nia bele hametin operasaun Timor Leste ho nasaun neebe sira haknaar aan ba.
“Ita nia esperansa Timor Leste hanesan pais ida kiik ita nia lian Timor iha mundu no pais hotu ita nia pais hotu-hotu ita nia kooperasaun Multilateral bele iha efeitu ida diak liu tan mais koerente, mais efikas ba ita nia relasaun diplomatika politika externa ida nee deit,” katak Ministru.
João Freitas de Câmara antes nee servisu nuudar Embaixador ba Tailandia, Kamboja, Laos, Mianmar no Reprezentante Permanente Timor Leste nian ba UNESCAP. Nia kaer pozisaun xave sira iha Ministeriu Negosius Estranjeirus, inklui Diretor Jeral ba Azia-Pasífiku no Sekretariu Jeral.
Prezidente Republika Jose Ramos Horta hatete Timor Leste nia misaun diplomatika sira importante tebes atu promove parseria internasional sira neebe forte,” katak PR Horta.
Prezidente hatoo agradesimentu ba embaixador sesante sira-nia servisu no oferese apoiu tomak ba Embaixador foun sira bainhira sira asume sira nia funsaun.
(eme)
