DILI, STLTIMORLESTE.com – Komemorasaun loron FALINTIL neebe monu iha dia 20 Agostu ba dala 50, sei selebra iha Tasi-Tolu.
Liafuan nee hatete husi Ministru Defeza, Kontra Almirante Donaciano Costa Gomes Pedro “Klamar Fuik” ba jornalista sira iha MinisteriuFinansas, Aitarak Laran, Segunda (11/08/2025).
Nia dehan, tema jerál iha ambitu komemorasaun loron FALINTIL ba dala 50 ba tinan nee mak “estende pas Timor Leste ba iha mundu”.
“Aniversáriu FALINTIL ba dala 50 nee kuaze halao iha munisípiu 14 nee hotu. Atividade ba komemorasaun nee hahú dia 18 too 20 Agostu, atividade boot ba komemorasaun nee sei konsentra iha Tasi-Tolu,” nia tenik.
Nia esplika, razaun Governu hili tema nee refleta ba tranformasaun FALINTIL ba iha F-FDTL, liu-liu ba dezenvolvimentu tuir nesesidade konstrusaun estadu defende soberania independensia.
Nia informa, tema nee mos haree ba enkuadramentu, integrasaun ba iha kombatente sira nina ba iha integrasaun ba iha sosiedade depois de independensia ne’e. Ho tema ida nee husu nain ulun sira ba entidade sira hodi esplika iha komemorasaun loron FALINTIL neebe sei monu iha 20 Agostu. Neebe sei halo tinan nee katak FALINTIL no F-FDTL nee forsa povu nian, povu nia oan sira mak halibur hamutuk iha nee, i povu nia oan mak kaer kilat hasoru nia inimigu sira.
“Ohin loron ita komemora 50 anos, ita koalia ba ita nia povu sira katak valor neebe mak sira fo ba liberta ita nia rai nee mak sira nia oan sira. Agora oan sira nee iha nee, oinsa mak fo valor ba inan aman sira neebe fo ona sira nia oan, sira nia laen, sira nia maun alin sira para liberta rai nee,” nia haktuir.
Nia informa, sikuensia komemora tinan 50 FALINTIL 20 Agostu nee mak hanesan iha loron 19 iha misa agradesimentu. Hodi fo ondra no gloria ba FALINTIL sira nia luta para bele fo hanoin ba jerasaun foun sira katak, independensia iha nia libertasaun.
“Tanba ita nia eroi sira fo rasik sira nia vida sosa ita nia liberdade,” nia koalia.
Nia husu ba ema hotu neebe mak sei moris uza liberdade ida uza ho responsabilidade tomak para estadu neebe mak harii, nasaun neebe dezenvolve sai referensia ba iha futuru.
Iha fatin ketak, Veteranus Costantino Ximenes “Nehek Metan” informa, loron FALINTIL neebe sei selebra iha dia 20 de Agostu nee importante tebes ba sidadaun hotu- hotu atu hatene no hanoin hikas ba momentu neebe luta ba ukun rasik aan.
“Loron nee fo hanoin ba ita, no ba povu tomak katak, no ita nia ema mate barak lakon vida, lakon maun alin no inan-aman ba rai ida nee, tanba nee jerasaun foun tenke hatene istoria husi loron FALINTIL nee saida maka akontese iha momentu loron nee,” nia tenik.
(jen)
