DÍLI, STLTIMORLESTE.com – Governu no parseiru sira halo validasaun ba Kuríkulu Nasionál Parteira atu hadi’a kualidade edukasaun no servisu saúde inan no bebé.
Validasaun kuríkulu ne’e hala’o iha Suai Room, Timor Plaza, Sesta (13/11/2026), ho partisipasaun husi ministériu, eskola edukasaun parteira, parseiru no espesialista sira.
Reprezentante Fundu Nasoins Unidas ba Populasaun (UNFPA) iha Timor-Leste, Navchaa Suren, afirma katak parteira sira iha papél importante tebes iha prestasaun servisu saúde ba feto durante isin-rua, partu no pós-partu.
Nia esplika katak, evidénsia globál hatudu parteira kompetente, ho apoiu no preparasaun adekuada, bele prevene to’o 80% husi mate inan no bebé foin moris.
“Parteira sira iha kapasidade atu halo mudansa boot no salva vida ema nian iha komunidade.”
Suren subliña katak investimentu iha edukasaun no formasaun ho kualidade ba estudante parteira no parteira graduada sei fó impaktu pozitivu ba saúde públika.
Nia mós defende nesesidade atu estabelese padraun nasionál ba edukasaun parteira, atu asegura eskola hotu-hotu iha rekursu, dosente kualifikadu no kapasidade institusionál ne’ebé adekuadu.
Padraun hirak-ne’e sei ajuda prepara graduadu parteira sira ho kompeténsia profisionál atu fornese servisu saúde ne’ebé seguru no ho kualidade.
Kuríkulu nasionál ne’e dezenvolve tuir padraun internasionál, inklui orientasaun husi Konfederasaun Internasionál Parteira (ICM) no padraun edukasaun parteira iha rejiaun Ázia.
Enkontru validasaun ne’e iha objetivu atu asegura katak kuríkulu ne’ebé dezenvolve ona kumpre padraun internasionál no responde ba nesesidade saúde iha Timor-Leste.
Suren mós hato’o importánsia parseria no kolaborasaun entre governu, instituisaun edukasaun no parseiru dezenvolvimentu atu implementa kuríkulu ne’e ho susesu.
Nia apela ba parte interesada hotu atu kontinua servisu hamutuk, haforsa edukasaun parteira no aumenta investimentu ba profisionál saúde sira.
Investimentu iha edukasaun parteira konsidera nu’udar investimentu estratéjiku ba saúde no bem-estar feto, bebé foin moris, família no komunidade iha Timor-Leste.
(dom)
