DÍLI, STLTIMORLESTE.com – Ministériu Saúde (MS) optimista katak Programa Wolbachia bele hamenus kazu dengue iha Timor-Leste, ho kobertura implementasaun to’o ona 80% iha Dili.
Prezidente Institutu Nasionál Saúde Públika Timor-Leste (INSP-TL), Nevio Sarmentu, afirma katak implementasaun Programa Wolbachia hatudu ona progresu signifikativu.
Nia hatete katak, to’o Setembru 2026, kobertura programa ne’e atinji ona liu 80% iha territóriu sidade Dili.
“Kobertura ne’e liu 80% ona, signifika katak susuk Wolbachia sai hanesan rede boot ida ne’ebé taka ona sidade Dili,” afirma Nevio Sarmentu.
Nia espera katak, iha tinan rua to’o tolu oin mai, programa ne’e bele hatudu impaktu pozitivu ba redusaun kazu dengue.
Nevio hatete katak, esperiénsia hosi nasaun seluk, inklui Indonézia no Brasil, hatudu rezultadu kona-ba redusaun kazu dengue liuhosi implementasaun Wolbachia.
“Ita haree ezemplu hosi Yogyakarta, Brasil no nasaun seluk. Sira nia kazu dengue tun tebes depois implementa programa Wolbachia,” dehan nia.
Maski nune’e, INSP-TL kontinua servisu hamutuk ho entidade relevante iha Ministériu Saúde atu hametin prevensaun dengue.
Entidade sira ne’e inklui Direção Nasionál Kontrolu Doensa (DNKD) no Direção Nasionál Promosaun no Edukasaun Saúde (DNPES).
Atividade sira inklui sensibilizasaun públika, abatizasaun no fumigasaun iha área risku sira, antes tama tempu udan.
“Ami kontinua fahe informasaun ba populasaun atu mantein ambiente moos no prevene bee halibur iha uma-kain,” nia haktuir.
Aleinde atividade prevensaun, Ministériu Saúde mós prepara ekipamentu laboratóriu, reazente no teste sira atu garante prontidaun.
Preparasaun ne’e importante atu permite autoridade saúde responde lalais bainhira mosu kazu dengue iha komunidade.
(dom)
